సాధారణంగా మీ భాగస్వామికి మీపై కోపం రావడానికి రెండు కారణాలు ఉండొచ్చు. మొదటిది.. తను అడిగింది మీరు ఇవ్వకపోవడం లేదా చేయకపోవడం. రెండోది.. మీరు తనపై కోపం చూపించడం. మొదటి విషయానికొస్తే.. తను మీ నుంచి ఏదైనా విలువైన బహుమతి అందుకోవాలనుకున్నారనుకోండి.. కానీ మీరు అందించలేకపోయారు. లేదా వారు చెప్పిన మరేదో పని చేయలేకపోయారు. అప్పుడు అందుకు గల కారణమేంటో తనకు స్పష్టంగా వివరించాలి. దీంతో వారు మిమ్మల్ని కాస్త అర్థం చేసుకుని మీపై అలక మానే అవకాశం ఉంటుంది. అలాగే రెండో కారణంలో చెప్పినట్లుగా మీ ఒత్తిడిని తనపై చూపించి తనను కోపగించుకున్నట్లయితే.. మీ కోపం కాస్త తగ్గాక తన దగ్గరకు వెళ్లి.. వారిని దగ్గరకు తీసుకుని 'సారీ రా.. ఈ రోజు నా మనసేం బాగోలేదు.. అప్పుడే నువ్వొచ్చి మాట్లాడుతుంటే కోపం వచ్చేసింది.. మరోసారి ఇలా చేయను..' అంటూ వారిని దగ్గరకు తీసుకోండి. దీంతో మీ భాగస్వామికి మీపై ఎంత కోపం ఉన్నా ఇట్టే కరిగిపోతారు.
అలా మెప్పించండి!
భాగస్వామి అలక తీర్చడానికి చాలామంది ఎంచుకునే మార్గం.. వారిని ఏదో ఒక విధంగా సర్‌ప్రైజ్ చేయడం. ఉదాహరణకు.. వారికిష్టమైన పదార్థాలు వండి పెట్టడం, వారి దగ్గరకు తీసుకెళ్లి ప్రేమగా నోట్లో పెడుతూ.. 'ఇంకా నాపై కోపం తగ్గలేదా? ఈసారికి మన్నించొచ్చు కదా!' అని పశ్చాత్తాపపడుతున్నట్లుగా అడగడం, అలాగే వారికి నచ్చే పనులు చేయడం, వారితో సమయం గడపడం.. ఇలా వివిధ రూపాల్లో వారిపై మీకున్న ప్రేమను తెలియపరచండి. దీంతో వారి అలకను నెమ్మదిగా తగ్గించచ్చు.
తప్పు ఒప్పుకోండి..
మీ భాగస్వామి అలకకు మీరే కారణమైతే.. వారిని బతిమాలి అలక తీర్చాల్సిన బాధ్యత కూడా మీదే.. మీరు వారిపై కాస్త తీవ్రస్థాయిలోనే కోప్పడి ఉంటే.. వాళ్లు కాస్త ఎక్కువ సమయం తీసుకునే అవకాశం ఉంటుంది. ఇలాంటి సందర్భాల్లో మామూలుగా సారీ చెప్పడమో, బుజ్జగించడమో చేస్తే వారు అస్సలు సంతృప్తి చెందరు. కాబట్టి వారిని ముద్దుపేర్లతో పిలుస్తూ.. 'నా బుజ్జి కదూ, నా బంగారు కొండ, ఈ ఒక్కసారికి క్షమించొచ్చు కదా..' అంటూ మీ పరిస్థితిని వివరించండి. దాంతో వారి కోపం తాటాకు మంటలా చల్లారిపోతుంది.