ఖాళీ దొరికితే చాలు. కాసేపు ఇన్‌స్టాలో.. తర్వాత ఎఫ్‌బీ.. అక్కడి నుంచి ట్విటర్‌ కళ్లు, మునివేళ్లు అన్నీ అంగుళాల తెరపైనే. ఎంతలా అంటే.. రోజులో 3 నుంచి 4 గంటలు ‘సోషల్‌ లైఫ్‌’లోనే చక్కర్లు కొట్టారు. ఇక లాక్‌డౌన్‌తో ఇంటికే పరిమితమైతే.. వేరే చెప్పాలా? నెట్టింటి తలుపులు తెరిచేసి నిత్యం సోషల్‌ మీడియాలోనే గడిపేస్తున్నారు. ఇంచుమించు రోజులో 6 నుంచి 7 గంటలు. లాక్‌డౌన్‌ ప్రకటించిన మొదటి వారంలో అయితే దేశంలో 87 శాతం సోషల్‌ మీడియా వాడకం పెరిగిందట. ఇది ఓ రకంగా యువతలో ఎక్కువగా మానసిక సమస్యలకు దారితీస్తోంది. నిత్యం ఏదో ఒకటి అప్‌లోడ్‌ చేయడానికి ప్రయత్నించడం. ఇంట్లో అందుకు తగిన వాతావరణం లేకపోవడంతో ఒత్తిడికి గురవుతున్నారు. సమస్యని అధిగమించేందుకు కొందరు యువత ఈ సోషల్‌ మీడియా డిస్టెన్సింగ్‌ని పాటిస్తూ కొత్త అలవాట్లకు దగ్గరవుతున్నామని చెబుతున్నారు.
కొన్ని నిమిషాలతో మొదలు..
‘లాక్‌డౌన్‌ మొదలయ్యింది మొదలు కొన్ని రోజుల్లోనే సోషల్‌ మీడియా నుంచి మెల్లగా దూరం జరగాలనుకున్నా. అందుకు కారణం ఇంట్లో వాతావరణమే. పేరెంట్స్‌, కజిన్స్‌.. చుట్టూ ఇంతమందిని పెట్టుకుని నేను ఒక్కడినే సోషల్‌ మీడియాలో గంటలు గంటలు.. ఏం చేస్తున్నా? అనే ఆలోచన వచ్చిన నాటి నుంచి రోజులో కొంత సమయం పాటు అన్ని ఎకౌంట్‌ల నుంచి సైన్‌ ఆఫ్‌ అవ్వడం కాస్త రిలీఫ్‌గా అనిపించింది. సమయాన్ని వేరే వాటిపై వెచ్చిస్తూ సోషల్‌ మీడియా నుంచి రోజులో కొన్ని గంటలే కాదు. రోజుల పాటు దూరంగా జరిగా. నాలో నేను ఊహించని కొత్త మార్పులు గమనిస్తున్నా. అప్పుడే నాకు ఇలా అనిపించింది. కరోనా నుంచి ‘సామాజిక దూరం’తో ఎలాగైతే జాగ్రత్త పడుతున్నామో.. సోషల్‌ మీడియా లైఫ్‌ నుంచి కాస్త పక్కకు జరిగేందుకు ‘సోషల్‌ మీడియా డిస్టెన్సింగ్’ని పాటించాలని నిర్ణయించుకున్నా’ అని గ్రాఫిక్‌ డిజైనర్‌గా పని చేస్తున్న రత్న చెబుతున్నాడు.
అపోహలు మరో కారణం..