మనం ఉండే ఇంటినే కాదు.. చుట్టపక్కల ప్రాంతాలనీ మనకు చేతనైనంతలో ప్లాస్టిక్‌ రహితంగా చేయగలిగితే? భవిష్యత్తులో మన నివాస ప్రాంతాలు, సముద్రాలు ప్లాస్టిక్‌ కాలుష్యంతో నిండిపోకుండా ఉంటాయి అంటోంది ఈ పర్యావరణ ఉద్యమాన్ని ప్రారంభించిన రెబెక్కా ప్రిన్స్‌. ఆస్ట్రేలియాకు చెందిన రెబెక్కా రెండేళ్ల క్రితం ప్లాస్టిక్‌ ఫ్రీ ఫౌండేషన్‌ని ప్రారంభించి ప్రపంచవ్యాప్తంగా ప్లాస్టిక్‌ వాడకం పట్ల అవగాహన తీసుకొస్తోంది. ఈ సంస్థ చేపట్టిన కార్యక్రమాల్లో ఒకటి ‘ప్లాస్టిక్‌ ఫ్రీ జులై’ ఛాలెంజ్. 177 దేశాలకు చెందిన 12 కోట్ల మందిని ఈ ఛాలెంజ్ ప్రభావితం చేసింది. ఇందులో పాల్గొన్న వాళ్లు టన్నుల కొద్దీ ప్లాస్టిక్‌ వినియోగానికి చెక్‌ చెప్పడమే కాకుండా... పునర్వినియోగాన్ని పెంచారు.మీరూ చేయాలనుకుంటున్నారా?
ఇంట్లో, స్కూల్ల్లో, ఆఫీసులో, రెస్టారెంట్లు లేదా కేఫుల్లో... ఒకసారి వాడిపారేసే ప్లాస్టిక్‌ వస్తువులని తిరిగి వాడకూడదు. వీలైనంత వరకూ పునర్వియోగాన్ని ప్రోత్సహించాలి.ప్రయాణాల్లో వాటర్‌ బాటిళ్లని కొని పారేసే బదులు... ఇంటి నుంచే వాటర్‌బాటిల్‌ని నీటితో నింపుకొని వెళ్లండి.
సూపర్‌మార్కెట్‌కి వెళ్లినప్పుడు అక్కడ దొరికే ప్లాస్టిక్‌ సంచుల్లో పచారీ సరకులని నింపేయకుండా... వెంట నూలు సంచులని తీసుకెళ్లడం, పచారీ సరకులని సీసాలు, జార్లలో నింపి తెచ్చుకోవడం మంచి పద్ధతి.
ప్లాస్టిక్‌ స్ట్రాలు, చెంచాలు, ఫోర్క్‌లు, ఇయర్‌ బడ్స్‌, లంచ్‌బాక్సుల వాడకాన్ని తగ్గించాల్సిందే. వీలుకాని పరిస్థితుల్లో మళ్లీమళ్లీ వాడే మెటల్‌ స్ట్రాలు, స్టీల్‌ చెంచాలు, బాక్సులని ఎంచుకోవాలి.