ఏ అనారోగ్యం బారిన పడినా..
కరోనా(corona victims) బారినపడిన వాళ్లే కాకుండా, డెంగీ(dengue victims) లాంటి విష జ్వరాలు, తీవ్రమైన అనారోగ్య సమస్యలు.. ఇలా వేటి బారినపడినా బాధితుల్లో కొద్దికాలం తర్వాత జుట్టు ఊడిపోవడం(hair loss) జరుగుతుందని వైద్య నిపుణులు పేర్కొంటున్నారు. టెలోజెన్‌ ఎఫ్లువియం అనే ప్రభావం వల్ల ఇలా జరుగుతుందని తెలిపారు. వ్యాధుల నుంచి కోలుకున్న వారిలో రోగనిరోధకశక్తి(immunity) బాగా తగ్గిపోవడం వల్ల అనేక రకాల మార్పులను ఎదుర్కొనాల్సి ఉంటుంది. జుట్టు ఊడిపోవడం(hair fall) అనేది కూడా దానిలో భాగంగా జరిగే ఓ ప్రక్రియే. ఆహారం విషయంలో కొన్ని జాగ్రత్తలు తీసుకుంటే చాలు. ప్రధానంగా ప్రొటీన్‌ ఎక్కువ ఉండే ఆహారం తినాలి. గుడ్లు ఎల్లోతో సహా, చికెన్‌, మొలకెత్తిన విత్తనాలు, పప్పుదినుసులు, పాలు రోజువారీ ఆహారంలో ఉండేలా చూసుకోవాలి.
‘విజయవాడ పటమటకు చెందిన సుధీర్‌(26) కొవిడ్‌ బారినపడి కోలుకున్నాడు. నెల రోజుల తర్వాత నుంచి జుట్టు ఊడిపోవడం ఎక్కువైంది. తల దువ్వితే చాలు వెంట్రుకలు రాలిపడిపోతున్నాయి. గతంలో ఈ సమస్య ఎప్పుడూ లేదు. సుధీర్‌ చెల్లి, తల్లికి కూడా ఇదే సమస్య ఎదురైంది. గతంలో కొద్దిగా ఊడుతుండేది.. ఇప్పుడు మాత్రం తలపై చెయ్యి పెడితే.. ఊడిపోతుండడంతో ఆందోళనతో ఆసుపత్రికి వచ్చారు.’
ఏపీలోని విజయవాడ, గుంటూరు నగరాల్లో ప్రస్తుతం ఆసుపత్రులకు జుట్టు ఊడిపోతోందంటూ వస్తున్న వారి సంఖ్య పెరుగుతోంది. వీరిలో అత్యధికశాతం మంది కొవిడ్‌ నుంచి కోలుకున్న వారే ఉంటున్నారు. ఒక్కో చర్మ వ్యాధుల నిపుణుడి వద్దకు గతంలో రోజుకు ఐదారుగురు ఈ సమస్యతో రాగా.. ప్రస్తుతం 20 నుంచి 30మంది వస్తున్నారు. కరోనా వైరస్‌ బారినపడి కోలుకున్న వారిలో జుట్టు ఊడడం అనేది సర్వసాధారణంగా జరిగే ప్రక్రియ అని వైద్యులు పేర్కొంటున్నారు. అందుకే అకస్మాత్తుగా ఊడిపోవడం ఆరంభమైతే ఆందోళన చెందాల్సిన పనిలేదని సూచిస్తున్నారు.
ఆందోళన చెందితే మరింత..
చాలామంది జుట్టు ఊడిపోతోందనే(hair fall) ఆందోళనతో ఆసుపత్రులకు వస్తుంటారు. వారి ఆదోళన వల్లే మరింత ఎక్కువ ఊడిపోతూ ఉంటుంది. అందుకే వ్యాధుల బారినపడి కోలుకునే వారిలో ఇలాంటివి సహజం అనే విషయాన్ని ప్రతి ఒక్కరూ అర్థం చేసుకోవాలి. ఆసుపత్రులకు వచ్చి తమ సమస్యకు మందులు రాయమంటూ ఎక్కువ మంది అడుగుతుంటారు. వాస్తవంగా అయితే ఈ సమస్యకు ఎలాంటి మందులు అవసరం లేదని వైద్యులు పేర్కొంటున్నారు. జుట్టు కొంతకాలం ఊడిన తర్వాత.. తిరిగి వచ్చేస్తుంది. ఇది శాశ్వతంగా ఊడిపోవడం కాదు, వ్యాధి నుంచి కోలుకోవడం వల్ల కలిగిన మార్పుల ప్రభావంతో జరుగుతున్న సమస్య మాత్రమేనన్నారు.