ఉదయం లేచిన దగ్గర్నుంచి రాత్రి పడుకునే వరకు పలుమార్లు ముఖాన్ని శుభ్రం చేసుకోవడం కామనే. అయితే ఈ క్రమంలో వివిధ రకాల సబ్బులు, ఫేస్‌వాష్‌లు ఉపయోగిస్తుంటాం. కానీ వాటిలో ఉండే రసాయనాలు అప్పటికప్పుడు ముఖాన్ని శుభ్రపరిచినప్పటికీ.. చర్మంలోని సహజసిద్ధమైన నూనెల్ని తొలగించి పొడిబారిపోయేలా చేస్తాయి. అందుకే వీటికంటే సహజసిద్ధమైన ఫేస్‌వాష్‌లే మంచివంటున్నారు డొమినికన్ భామలు.
కలబందతో..
ముఖాన్ని శుభ్రం చేసుకునేందుకు కలబందను మించింది లేదంటున్నారు. రోజూ ముఖాన్ని ఓసారి చల్లటి నీటితో శుభ్రం చేసుకొని ఆపై కలబంద గుజ్జును ముఖం, మెడ ప్రాంతాల్లో అప్త్లె చేసుకుంటుంటారు. కాసేపటి తర్వాత చల్లటి నీటితో కడిగేస్తే.. ముఖంపై ఉండే దుమ్ము-ధూళి, ఇతర కాలుష్య కారకాలన్నీ తొలగిపోయి శుభ్రపడుతుందనేది ఈ ముద్దుగుమ్మల బ్యూటీ సీక్రెట్. అంతేకాదు.. ఈ కలబంద ముఖంపై ఉండే మొటిమల్ని, వాటి తాలూకు మచ్చల్ని తగ్గించడంతో పాటు చర్మాన్ని తేమగా, కాంతివంతంగా, మృదువుగా మార్చుతుంది. అలాగే ఎండ వల్ల కందిన చర్మానికీ ఇది చక్కటి పరిష్కారం చూపుతుంది.
తేమనందించే ఫేస్‌ప్యాక్ ఇది!
కొన్నిసార్లు చర్మం తేమను కోల్పోయి నిర్జీవంగా మారుతుంది. చర్మంపై ఏర్పడిన పగుళ్ల కారణంగా దురద, ఎరుపెక్కడం.. వంటి సమస్యలు ఎదురవుతుంటాయి. ఇలాంటి సౌందర్య సమస్యలను దూరం చేసుకోవడానికి ఇంట్లో తయారుచేసుకునే సహజసిద్ధమైన ఫేస్‌ప్యాక్‌లనే ఆశ్రయిస్తుంటారు డొమినికన్ అతివలు. ఇందుకోసం కొద్దిగా ఓట్‌మీల్‌లో టీస్పూన్ తేనె కలిపి మెత్తటి మిశ్రమంగా చేసుకుంటారు. దీన్ని ముఖానికి, మెడకు ప్యాక్‌లా వేసుకొని.. ఆరాక చల్లటి నీటితో శుభ్రం చేసుకుంటుంటారు. ఇలా తరచూ చేయడం వల్ల చర్మం కోల్పోయిన తేమను తిరిగి పొందుతుంది.. అలాగే మృదువుగా, ప్రకాశవంతంగానూ మారుతుంది.
పట్టులాంటి జుట్టుకు అవకాడో!
కాలుష్యం, మనం తీసుకునే ఆహారం.. వంటివి మన చర్మ ఆరోగ్యం పైనే కాదు.. జుట్టు ఆరోగ్యం పైన కూడా ప్రతికూల ప్రభావం చూపుతాయి. తద్వారా జుట్టు పొడిబారిపోవడం, గరుకుగా మారడం, రాలిపోవడం.. వంటివి సహజమే. మరి, ఈ సమస్యలన్నింటి నుంచి బయటపడాలంటే పార్లర్ల వెంట పరుగులు తీయడం ఆపి.. తమలా సహజసిద్ధమైన హెయిర్‌మాస్కుల్ని ఉపయోగించమని సలహా ఇస్తున్నారు డొమినికన్ భామలు. ఈ దేశపు మగువలు తమ జుట్టును పట్టుకుచ్చులా మెరిపించుకోవడానికి అవకాడోతో చేసిన హెయిర్‌మాస్కు వేసుకుంటుంటారు. ఇందుకోసం ఒక అవకాడో గుజ్జుకు, కాస్త మయొనీజ్ ఛీజ్ కలిపి మృదువైన మిశ్రమంలా చేసుకోవాలి. దీన్ని జుట్టు కుదుళ్ల దగ్గర్నుంచి చివర్ల వరకు మాస్కులా అప్త్లె చేసుకొని అరగంట పాటు అలాగే ఉంచుకోవాలి. ఆపై గాఢత తక్కువగా ఉండే షాంపూతో తలస్నానం చేస్తే జుట్టు ఆరోగ్యంగా, పట్టులా మెరుస్తుంది.. ఈ మాస్క్‌తో కుదుళ్లు బలంగా మారడంతో పాటు జుట్టు రాలే సమస్య కూడా అదుపులోకి వస్తుంది.