మైనర్​తో అసభ్య ప్రవర్తన.. వాలంటీర్​పై పోక్సో కేసు

ఏపీలోని ప్రకాశం జిల్లా యద్ధనపూడి మండలం సురవరపుపల్లె గ్రామ వాలంటీర్​పై పోలీసులు పోక్సో చట్టం కింద కేసు నమోదు చేశారు. మద్యం మత్తులో మైనర్​తో అసభ్యకరంగా ప్రవర్తించి, ఆమె తల్లిపై దాడికి పాల్పడినందుకుగాను బాధితుల ఫిర్యాదు మేరకు కేసు నమోదు చేసినట్లు పోలీసులు తెలిపారు.

బాలికతో అసభ్యంగా ప్రవర్తించిన వాలంటీర్​పై పోలీసులు పోక్సో కేసు నమోదు చేశారు. ఈ ఘటన యద్ధనపూడి మండలం సురవరపుపల్లె గ్రామంలో జరిగింది. వాలంటీర్​గా పని చేస్తున్న ఏ. రాజేశ్​.. మద్యం సేవించి రాత్రి 9 గంటలకు ఓ ఇంటి వద్దకు వెళ్లాడు. పొలం పాసుబుక్, ఆధార్ కార్డు కావాలని అడిగాడు.

ఈ క్రమంలో ఇంటి యజమాని భార్య వాటిని తెచ్చేందుకు లోపలికి వెళ్లగా.. అక్కడే ఉన్న కుమార్తెతో వాలంటీర్​ అసభ్యంగా ప్రవరించాడు. బాలిక కేకలు వేయగా.. ఆమె తల్లి అక్కడకు వచ్చి అడ్డుకున్నారు. దీంతో ఆగ్రహానికి గురైన వాలంటీర్​ ఆమెపైనా దాడికి దిగాడు. బాధితురాలు మైనర్ అయినందున ఆమె ఫిర్యాదుపై పోలీసులు పోక్సో చట్టం క్రింద కేసు నమోదు చేశారు.

ఇవీ చూడండి:ఘోర రోడ్డు ప్రమాదం... అక్కడికక్కడే ఇద్దరు యువకులు మృతి