కృష్ణానదిలో ఇద్దరు యువకుల గల్లంతు.. పోలీసుల గాలింపు

సరదాగా ఈతకు వెళ్లిన ఇద్దరు యువకులు ప్రమాదవశాత్తు నదిలో గల్లంతయ్యారు. స్థానికుల సమాచారం మేరకు పోలీసులు గాలింపు చర్యలు చేపట్టారు. ఈ ఘటన సూర్యాపేట జిల్లాలో చోటుచేసుకుంది.

సూర్యాపేట జిల్లా చింతలపాలెం మండలం వజినేపల్లి గ్రామంలో విషాదం చోటుచేసుకుంది. వజినేపల్లి ఘాట్​ వద్ద కృష్ణా నదిలో ఈతకు వెళ్లి నరేందర్​, వేణుగోపాల్ అనే ఇద్దరు యువకులు గల్లంతయ్యారు.

హైదరాబాద్​కు చెందిన నరేందర్​, ఏపీలోని గుంటూరు జిల్లాకు చెందిన వేణుగోపాల్​లు వజినేపల్లిలోని తమ బంధువుల ఇళ్లకొచ్చారు. ఈ క్రమంలో గ్రామానికి చెందిన మరో నలుగురితో కలిసి కృష్ణా నదిలో ఈతకు వెళ్లారు. ప్రమాదవశాత్తు నరేందర్ నదిలో మునిగిపోగా.. అతడిని కాపాడే ప్రయత్నంలో వేణుగోపాల్​ నదిలో కొట్టుకుపోయాడు.

ఒడ్డుకు చేరిన మిగతా నలుగురు గ్రామస్థులకు సమాచారం అందించారు. స్థానికుల సమాచారం మేరకు ఘటానా స్థలికి చేరుకున్న పోలీసులు గాలింపు చర్యలు చేపట్టారు.