పట్టపగలే ఇళ్లు దోచేస్తున్న ఇద్దరు దొంగలు అరెస్ట్​

మేడ్చల్​ జిల్లా జగద్గిరిగుట్టలో పట్టపగలే ఇళ్లలో చోరీలు చేస్తున్న ఇద్దరు దొంగలను పోలీసులు అరెస్టు చేశారు. నిందితుల నుంచి సుమారు రూ.12లక్షల విలువైన 21 తులాల బంగారు ఆభరణాలు, 80 తులాల వెండి ఆభరణాలు, ఓ ద్విచక్రవాహనం, సిలిండర్, టీవీ, చరవాణీని పోలీసులు స్వాధీనం చేసుకున్నారు.

రెక్కీ నిర్వహించి పట్టపగలే ఇళ్లలో దొంగతనాలకు పాల్పడుతున్న ఇద్దరు నిందితులను పోలీసులు అరెస్టు చేశారు. మేడ్చల్​ జిల్లా జగద్గిరిగుట్టలో వాహన తనిఖీలు చేస్తుండగా... ఓ ద్విచక్రవాహనంపై అనుమానాస్పదంగా పారిపోతున్న ఇద్దరిని పోలీసులు అదుపులోకి తీసుకున్నారు. తమదైన శైలిలో విచారించగా... అసలు విషయం బయటపడింది. శ్రీను (25), పరుశురాం (28) ఇద్దరిపై రాష్ట్ర వ్యాప్తంగా పలు పీఎస్​లలో కేసులు ఉన్నాయని గుర్తించారు.

పలుమార్లు జైలుపాలైన వీళ్లు... విడుదలైన తరువాత కూడా జగద్గిరిగుట్టలో పలు చోరీలకు పాల్పడ్డట్లు బాలానగర్​ డీసీపీ పద్మజ వెల్లడించారు. నిందితుల నుంచి 21 తులాల బంగారు ఆభరణాలు, 80 తులాల వెండి ఆభరణాలు, ఓ ద్విచక్రవాహనం, సిలిండర్, టీవీ, ఫోన్ స్వాధీనం చేసుకున్నారు. వీటి విలువ సుమారు రూ.12.25 లక్షలుగా పోలీసులు తెలిపారు. ఇద్దరిని రిమాండ్​కు పంపుతున్నట్లు పోలీసులు పేర్కొన్నారు.

ఎవరైనా సంక్రాంతికి సొంతూళ్లకు వెళ్తే ఇంట్లో విలువైన వస్తువులు ఉంచకూడదని తెలిపారు. ఊరేళ్ళేవారు పోలీసులకు పిర్యాదు చేస్తే ఆ ప్రాంతంలో పెట్రోలింగ్ నిర్వహిస్తామని భరోసా ఇచ్చారు.

ఇదీ చూడండి: దోపిడీ దొంగల బీభత్సం... ఒకేసారి 6 ఇళ్లలో చోరీ