విషాదం: కారు ఢీకొని ఇద్దరు వ్యక్తులు దుర్మరణం

ఓ బ్యాంకులో విద్యుత్​ అంతరాయం ఏర్పడటం వల్ల రోడ్డుపక్కన నిల్చుని మరమ్మతులు చేస్తున్న వారిని మృత్యువు కబళించింది. కారు రూపంలో వచ్చి వారి ప్రాణాలను బలితీసుకుంది. ఈ విషాద ఘటన జూబ్లీహిల్స్​లో జరిగింది.

హైదరాబాద్​ జూబ్లీహిల్స్ రోడ్ నంబర్ 92లోని ఫెడరల్ బ్యాంకు వద్ద శనివారం రాత్రి రోడ్డుప్రమాదం చోటుచేసుకుంది. కారు ఢీకొని ఇద్దరు వ్యక్తులు అక్కడికక్కడే దుర్మరణం చెందారు.

బ్యాంకులో విద్యుత్​ అంతరాయం ఏర్పడటం వల్ల ఓ ఎలక్ట్రీషియన్​, ఆ భవనంలో పని చేస్తున్న వాచ్​మెన్​ రోడ్డు పక్కన నిల్చుని మరమ్మతులు చేస్తున్నారు. ఈ క్రమంలో వేగంగా దూసుకొచ్చిన కారు.. అదుపు తప్పి వీరిని ఢీకొట్టింది. ప్రమాదంలో ఇద్దరూ అక్కడికక్కడే మృతి చెందారు.

విషయం తెలుసుకున్న పోలీసులు ఘటనా స్థలికి చేరుకున్నారు. వాచ్​మెన్​ నాగర్​కర్నూల్​ జిల్లా తెల్కపల్లికి చెందిన బి.నగేశ్​గా గుర్తించారు. మృతదేహాలను పోస్టుమార్టం నిమిత్తం ఆసుపత్రికి తరలించారు. ఈ మేరకు కేసు నమోదు చేసుకుని దర్యాప్తు చేస్తున్నారు.