జల్సాల కోసం చోరీలు.. చివరికి కటకటాలు

జల్సాలకు అలవాటుపడి వరుస చోరీలకు పాల్పడుతున్న ఇద్దరు అంతర్రాష్ట్ర దొంగలను వికారాబాద్ జిల్లా తాండూరు పోలీసులు అరెస్టు చేశారు. వారి నుంచి తొమ్మిది తులాల బంగారం, ఒక ద్విచక్ర వాహనాన్ని స్వాధీనం చేసుకున్నారు.

హైదరాబాద్​కు చెందిన జావేద్ గతంలో పలు నేరాలకు పాల్పడి జైలుకు వెళ్లాడు. ఆ తర్వాత కొన్నాళ్ల పాటు ఆటో నడుపుతూ కాలం గడిపాడు. ఆ ఆదాయం అతని జల్సాలకు సరిపోకపోవడం వల్ల మళ్లీ చోరీలకు పాల్పడ్డారు.

సంగారెడ్డి జిల్లా పటాన్​ చెరులోని ఓ వైన్స్​ ముందు ఉన్న ద్విచక్రవాహనాన్ని కొట్టేసి దాని నెంబర్​ప్లేట్​ను కర్ణాటకకు చెందిన దానిగా మార్చేశాడు. దానిపై అతను కర్ణాటక రాష్ట్రంలోని గుల్బర్గా ప్రాంతానికి పారిపోయాడు. అక్కడ పరశురామ్​ అనే వ్యక్తితో కలిసి వరుసగా మహిళల మెడల్లోని పుస్తెలతాళ్లను దొంగలించడం ప్రారంభించారు.

వికారాబాద్​ జిల్లా తాండూర్​ వచ్చి కర్ణాటక- తెలంగాణ ప్రాంతాల్లో అనేక దొంగతనాలకు పాల్పడ్డారు. కాగా తాండూరు పోలీసులు పట్టణంలో వాహనతనిఖీలు నిర్వహిస్తుండగా కర్ణాటక వాహన ప్లేటు ఉన్న వీరిని ఆపి అనుమానిస్తే అసలు నిజాలు బయటపెట్టారు. పోలీసులు వద్ద జావేద్, పరశురామ్​లు వారు చేసిన నేరాలును అంగీకరించారు. వారి వద్ద నుంచి 9 తులాల బంగారంతో పాటు ద్విచక్రవాహనాన్ని స్వాధీనం చేసుకున్నట్టు డీఎస్పీ వెల్లడించారు. వారిపై గుల్బర్గా పోలీస్​స్టేషన్​లో అనేక చైన్​స్నాచింగ్​ కేసులు నమోదయ్యాయని డీఎస్పీ లక్ష్మీనారాయణ తెలిపారు.

ఇవీ చూడండి:రాఖీ స్పెషల్... వీరి అనుబంధం.. దేశానికే రక్ష కావాలి..