ఆస్పత్రి ఉద్యోగి అనుమానాస్పద మృతి

హైదరాబాద్​ సనత్​నగర్​లోని​ ఓ ప్రైవేట్​ ఆస్పత్రిలో పనిచేస్తున్నఓ ఉద్యోగి అనుమానాస్పద మృతి కలకలం సృష్టించింది. దవాఖాన యాజమాన్యం అతని మృతదేహాన్ని గుట్టు చప్పుడు కాకుండా గాంధీకి తరలించడం అనుమానాలకు దారితీసింది. కేసు నమోదు చేసుకున్న పోలీసులు విచారణ జరుపుతున్నారు.

హైదరాబాద్​ సనత్​నగర్​లోని​ ఓ ప్రైవేట్​ ఆస్పత్రిలో ఆపరేషన్​ థియేటర్​ టెక్నీషియన్ పనిచేస్తున్న సత్యకృష్ణ అనే ఉద్యోగి అనుమానాస్పద స్థితిలో మృతి చెందాడు. దవాఖాన యాజమాన్యం మృతదేహాన్ని గుట్టు చప్పుడు కాకుండా గాంధీకి తరలించడంపై అతని కుటుంబ సభ్యులు అనుమానాలు వ్యక్తం చేస్తున్నారు.

ఆస్పత్రి యాజమాన్యం వేధింపులతోనే తమ కుమారుడు చనిపోయాడని తండ్రి సత్యనారాయణ ఆరోపించారు. శనివారం మధ్యాహ్నం డ్యూటీకి వెళ్లిన సత్యకృష్ణ సాయంత్రం 5 గంటలకు చనిపోయాడని పోలీసుల ద్వారా తెలిసిందన్నారు. బాత్రూంలో జారిపడి మరణించినట్లు ఆస్పత్రి యాజమాన్యం తెలిపిందని సత్యనారాయణ చెప్పారు.

కుమారుడి మరణంతో తల్లిదండ్రులు బోరున విలపించారు. సత్యకృష్ణ మృతిపై పోలీసులు కేసు నమోదు చేసుకొని దర్యాప్తు చేపట్టారు.

ఇవీ చూడండి:పట్టణ ప్రాంతాలపై ప్రత్యేక దృష్టి