ఆరుగురు దొంగలు అరెస్ట్.. బంగారం, నగదు స్వాధీనం​

భద్రాద్రి కొత్తగూడెం జిల్లా మణుగూరు పీవీ కాలనీ కూడలిలో పోలీసులు వాహనాల తనిఖీ చేపట్టారు. పారిపోతున్న వ్యక్తిని అదుపులోకి తీసుకుని విచారించగా మొత్తం ఆరుగురు కలిసి దొంగతనాలకు పాల్పడినట్లు ఒప్పుకున్నాడు. అతనితో సహా మొత్తం ఆరుగురిని పోలీసులు అరెస్ట్​ చేశారు. వారి నుంచి 6.2 తులాల బంగారం, 3లక్షల 50వేల నగదు, ఆటో, ద్విచక్ర వాహనాన్ని స్వాధీనం చేసుకున్నారు.

భద్రాద్రి కొత్తగూడెం జిల్లా మణుగూరులో పలు ఇళ్లలో చోరీలకు పాల్పడిన ఆరుగురు వ్యక్తులను పోలీసులు అరెస్టు చేశారు. సీఐ భాను ప్రకాశ్​, ఎస్సై నరేశ్​ పీవీ కాలనీ కూడలిలో వాహనాలు తనిఖీ చేపట్టారు. ఆ సమయంలో ఆటో దిగి పారిపోతున్న గంటా ప్రవీణ్ అనే వ్యక్తిని అదుపులోకి తీసుకున్నారు.

చల్లా రాము, బండారు భరత్, అక్కినపల్లి సాంబశివరావు, అక్కినపల్లి సతీశ్​తో కలిసి ఏడాది కాలంగా పలు ఇళ్లలో ప్రవీణ్ చోరీలకు పాల్పడినట్లు పోలీసుల విచారణలో తేలిందని ఏఎస్పీ శుభరీశ్​ వెల్లడించారు. వారి నుంచి 6.2 తులాల బంగారం, 3లక్షల 50వేల నగదు, ఆటో, ద్విచక్ర వాహనాన్ని స్వాధీనం చేసుకున్నామన్నారు.

చోరీ చేసిన బంగారాన్ని సుందరయ్య నగర్​కు చెందిన సాగర్ అనే వ్యక్తికి విక్రయించారని.. మొత్తం ఐదు చోట్ల చోరీలకు పాల్పడ్డారని ఏఎస్పీ పేర్కొన్నారు. చోరీ కేసును ఛేదించేందుకు కృషిచేసిన సీఐ, ఎస్సైలతోపాటు సిబ్బందిని ఏఎస్పీ అభినందించారు.

ఇదీ చూడండి: గోదాంలో అగ్నిప్రమాదం... డెకరేషన్​ సామగ్రి దగ్ధం