కరోనా ఎఫెక్ట్​... అప్పుడు 12 ఇప్పుడు 01

కరోనా నేపథ్యంలో రాష్ట్ర సర్కారు లాక్‌డౌన్‌ను కఠినంగా అమలుచేస్తోంది. రోడ్లపై ఇష్టారాజ్యంగా తిరిగేవారిపై పోలీసులు చర్యలు తీసుకుంటున్నారు. రాకపోకలు ఎక్కడికక్కడ బంద్‌ కావడంతో ప్రమాదాల సంఖ్య గణనీయంగా తగ్గింది.

లాక్​డౌన్​ నేపథ్యంలో హైదరాబాద్​లో రోడ్డు ప్రమదాల సంఖ్య గణనీయంగా తగ్గింది. సైబరాబాద్‌ కమిషనరేట్‌ పరిధిలో లాక్‌డౌన్‌ కంటే ముందు నిత్యం సగటున 12 రోడ్డు ప్రమాదాలు చోటుచేసుకోగా.. ఇప్పుడా సంఖ్య ఒకటికి తగ్గినట్లు తాజాగా ట్రాఫిక్‌ పోలీసుల అధ్యయనంలో తేలింది.

ఈ ఏడాది రోడ్డు ప్రమాదాల నివారణపై సైబరాబాద్‌ ట్రాఫిక్‌ పోలీసులు ప్రత్యేక దృష్టి సారించారు. హాట్‌స్పాట్‌లను గుర్తించి ముందస్తు చర్యలు చేపడుతున్నారు. ఈ నేపథ్యంలోనే లాక్‌డౌన్‌ కంటే ముందు(జనవరి 1 నుంచి మార్చి 21 వరకు).. ఆ తర్వాత(మార్చి 22-ఏప్రిల్‌ 22 వరకు) ప్రమాదాల తీవ్రతపై అధ్యయనం చేశారు. గతంతో పోలిస్తే ఇప్పుడు క్షతగాత్రుల సంఖ్య భారీగా తగ్గినట్లు గుర్తించారు.