పరిగిలో కరీంనగర్​ వాసులకు రోడ్డు ప్రమాదం.... ఒకరు మృతి

సరదా కోసం విహారయాత్రకు వెళ్లి వస్తున్న ఆ మిత్రులపైకి లారీ యమపాశంగా దూసుకొచ్చింది. వారి కుటుంబాల్లో అంతులేని విషాదాన్ని మిగిల్చింది. పరిగి వద్ద జరిగిన ఈ ఘోర రోడ్డు ప్రమాదంలో ఓ వ్యక్తి చినిపోగా... మరో ఇద్దరు తీవ్ర గాయాలతో మృత్యువుతో పోరాడుతున్నారు.

కరీంనగర్​ జిల్లాకు చెందిన కొందరు గోవా ట్రిప్​కు వెళ్లి తిరిగి వస్తుండగా రోడ్డు ప్రమాదం జరిగింది. ఉల్లాసంగా సాగిన వారి ప్రయాణంలో ఒక్కసారిగా విషాదం చోటు చేసుకుంది. తిరుగు ప్రయాణంలో వికారాబాద్ జిల్లా పరిగి సబ్ స్టేషన్ ముందు ఉదయం 7 గంటల ప్రాంతంలో ఎదురెదురుగా వస్తున్న సిమెంట్ ట్యాంకర్ లారీ, వీరి ఎర్టిగా కారు ఢీకొన్నాయి. ఈ ఘటనలో సుదర్శన్ మృతి చెందగా భానుమూర్తి, చిరంజీవికి తీవ్ర గాయాలయ్యాయి.

మరో ముగ్గురు సల్పగాయాలతో బయటపడ్డారు. స్థానికుల సహాయంతో ప్రథమ చికిత్స కోసం వీరిని పరిగి ప్రభుత్వ ఆసుపత్రికి తరలించారు. ఇద్దరి పరిస్థితి విషమంగా ఉన్నందున హైదరాబాద్​కు తరలించారు. ఘటన స్థలానికి చేరుకున్న పోలీసులు కేసు నమోదు చేసి దర్యాప్తు చేస్తున్నారు.

ఇదీ చూడండి:కరోనా వైరస్‌పై చిన్నారులకు బొమ్మల పుస్తకం