దీపావళి వేళ విషాదం: టపాసుల కోసం వెళ్లి ఓ బాలుడు మృతి

దీపావళి రోజు ఓ ఇంట్లో తీరని విషాదం నెలకొంది. పండుగ పూట టపాకాయలు తీసుకోవడానికి వెళ్లొస్తున్న క్రమంలో ద్విచక్రవాహనాన్ని ట్రాక్టర్​ ఢీ కొట్టింది. ఈప్రమాదంలో ఓ బాలుడు అక్కడికక్కడే మృతి చెందాడు. కాగా మరొకరికి గాయాలయ్యాయి. ఈఘటన నిర్మల్ జిల్లా భైంసాలో చోటుచేసుకుంది.

సంతోషంగా పండుగ జరుపుకుందాం అనుకున్న సమయంలో ఆ కుటుంబానికి ఓ పిడుగులాంటి వార్త వినిపించి.. కుటుంబ సభ్యుల్లో తీరని విషాదాన్ని నింపింది. నిర్మల్ జిల్లా భైంసా పట్టణంలోని భగతసింగ్​నగర్ చెందిన అంజనాబాయి కుమారస్వామి దంపతుల మనవడు యశ్వంత్ (14) పండుగకు వచ్చాడు. తన మేనమామ అయిన సంజుతో కలిసి టపాసులను కొనుగోలు చేయడానికి ద్విచక్ర వాహనంపై బయలుదేరారు. వివేకానంద చౌరస్తా వద్ద ఓ ట్రాక్టర్ ద్విచక్రవాహనాన్ని ఢీ కొనగా యశ్వంత్ అక్కడిక్కడే మృతి చెందాడు.

టపాసుల కోసం వెళ్లిన తమ మనుమడు ఇక తిరిగిరాని లోకాలకు వెళ్లాడని తెలియగానే ఆకుటుంబ సభ్యులు గుండెలవిసేలా రోధించారు. యశ్వంత్ తల్లిదండ్రులు సరిత రాజు హైదరాబాద్​లోని బోరాబండలో నివాసం ఉంటారు. కాగా రోడ్డుప్రమాదం మేరకు పోలీసులు కేసు నమోదు చేసుకుని దర్యాప్తు చేస్తున్నారు.

ఇదీ చూడండి:గోదావరి ఒడ్డున పార్టీ.. ఈతకు దిగి నలుగురు గల్లంతు