నాలుగేళ్ల బాలుడి కిడ్నాప్​ కేసును ఛేదించిన పోలీసులు

భాగ్యనగరంలో ఈ నెల 22న కిడ్నాప్​కు గురైన బాలుడి కేసును సౌత్ జోన్ టాస్క్ ఫోర్స్ పోలీసులు ఛేదించారు. నిందితురాలిని అదుపులోకి తీసుకుని... బాలుడి తన తల్లికి అప్పగించారు.

హైదరాబాద్​లో ఈనెల 22న కిడ్నాప్​కు గురైన నాలుగేళ్ల బాలుడి కేసును సౌత్ జోన్ టాస్క్ ఫోర్స్ పోలీసులు ఛేదించారు. క్షేమంగా షేక్ అబ్దుల్ వహాబ్​ని తన తల్లికి అప్పగించి... నిందితురాలిని అదుపులోకి తీసుకున్నట్లు పోలీస్​ అధికారులు తెలిపారు.

భాగ్యనగరంలోని పాతబస్తి ఫలక్ నుమా ప్రాంతానికి చెందిన ఓ మహిళ వైద్యం కోసం తన చిన్నారితో కలిసి జహనుమా ప్రాంతములోని ప్రైవేట్​ క్లీనిక్​కి వెళ్లింది. మహిళ క్లినిక్​లో ఉండగా చిన్నారి ఆసుపత్రి బయట ఆడుకుంటున్నాడు. కొద్ది సమయం తర్వాత తల్లి బయటికి వచ్చి చూస్తే చిన్నారి కనిపించలేదు. వెంటనే చుట్టు పక్కన ప్రాంతాల్లో వెతికినా ప్రయోజనం లేకపొవడం వల్ల పోలీసులను ఆశ్రయించారు.

సౌత్​జోన్ టాస్క్ ఫోర్స్ పోలీస్​ బృందం విచారణ చేపట్టింది. దూద్​బౌలి ప్రాంతానికి చెందిన భిక్షాటన చేసే సమ్రీన్(45) అనే మహిళ ఈ చర్యకి పాల్పడిందని పోలీసులు నిర్ధారించుకున్నారు. వెంటనే ఆమెను అదుపులోకి తీసుకుని చిన్నారిని క్షేమంగా రక్షించారు.

తన పెద్ద కూతురికి వివాహం చేసి 9 ఏళ్లైనా పిల్లలు పుట్టకపొవడం వల్ల నిందితురాలు ఈ ఘటనకు పాల్పడినట్లు పోలీసులు తెలిపారు. తదుపరి విచారణ కోసం కిడ్నాప్​కు పాల్పడిన మహిళను ఫలక్ నుమా పోలీసులకు అప్పగించారు.