కిడ్నాప్​ కేసు: మరో ముగ్గురి కస్టడీ కోరుతూ పోలీసుల పిటిషన్​

బోయిన్​పల్లి కేసులో మరో ముగ్గురు నిందితులను వారం రోజుల కస్టడీకి ఇవ్వాలని పోలీసులు కోర్టును కోరారు. కస్టడీ పిటిషన్​పై పోలీసుల వాదనలు విన్న న్యాయస్థానం తీర్పును రేపటికి వాయిదా వేసింది.

ప్రవీణ్ రావు సోదరుల అపహరణ కేసులో అరెస్ట్ చేసిన ముగ్గురు నిందితులను కస్టడీలోకి ఇవ్వాలని బోయిన్​పల్లి పోలీసులు పిటిషన్ దాఖలు చేశారు. బాలచెన్నయ్య, మల్లికార్జున్ రెడ్డి, సంపత్​లను 7 రోజుల కస్టడీకి ఇవ్వాలని సికింద్రాబాద్ న్యాయస్థానంలో పిటిషన్ దాఖలు చేశారు. ముగ్గురు నిందితులను ఈ నెల 11న పోలీసులు అరెస్ట్ చేసి చంచల్ గూడ జైలుకు తరలించారు.

అపహరణలో భాగంగా నిందితులు మియాపూర్​లోని ఓ మొబైల్ దుకాణంలో 6 చరవాణీలు కొనుగోలు చేసి... వాటితోనే సంభాషణలు కొనసాగించినట్లు పోలీసుల దర్యాప్తులో తేలింది. అపహరణ కంటే ముందు ప్రవీణ్​రావు ఇంటి చుట్టూ నిందితులు రెక్కీ నిర్వహించినట్లు పోలీసులు గుర్తించారు. దర్యాప్తులో పురోగతి కోసం నిందితులను ప్రశ్నించాల్సి ఉందని... కస్టడీకి తీసుకొని ప్రశ్నిస్తే మరిన్ని వివరాలు తెలుసుకునే అవకాశముందని పోలీసులు పిటిషన్​లో పేర్కొన్నారు. వాదనలు విన్న న్యాయస్థానం తీర్పును రేపటికి వాయిదా వేసింది.

ఇదీ చూడండి:అఖిలప్రియ బెయిల్ పిటిషన్​ తిరస్కరించిన న్యాయస్థానం