పోలీసుల నకిలీ ఫేస్​బుక్​లతో దోచేస్తున్నారు

సైబర్​ నేరగాళ్లు రెచ్చిపోతున్నారు. సామాజిక మాధ్యమాలను ఆసరాగా చేసుకుని విజృంభిస్తున్నారు. గతంలో పలువురు రాజకీయ నాయకుల నకిలీ ఫేస్​బుక్​ ఖాతాలు సృష్టించి హల్​చల్​ చేశారు. తాజాగా పోలీసు అధికారుల పేరుతో ఫేక్​ అకౌంట్లు క్రియోట్​ చేసి సైబర్​ నేరగాళ్లు డబ్బులు దండుకుంటున్నారు. ఈ నేపథ్యంలో సామాజిక మాధ్యమాల పట్ల ఎప్పటికప్పుడూ జాగ్రత్తగా ఉండాలని పోలీసులు చెబుతున్నారు.

హైదరాబాద్​ జూబ్లీహిల్స్ ట్రాఫిక్ సీఐ ముత్తు పేరుతో సైబర్ నేరగాళ్లు నకిలీ ఫేస్​బుక్ ఖాతా తెరిచారు. ఆయన పేరుతో పలువురికి ఫ్రెండ్ రిక్వెస్టులు కూడా పంపారు. ఆయన స్నేహితులు కొంతమంది ఫ్రెండ్ రిక్వెస్ట్​ను అంగీకరించారు. దీంతో సైబర్ నేరగాళ్లు వెంటనే ఐదు వేలు పంపాల్సిందిగా ఓ వ్యక్తిని కోరారు. వెంటనే అనుమానం వచ్చిన అతను సీఐ ముత్తు దృష్టికి తీసుకెళ్లాడు.

నకిలీ ఫేస్ బుక్ ఖాతా తెరిచారని వెంటనే గుర్తించిన ముత్తు.. తన అసలైన ఫేస్​బుక్​తోపాటు ట్వీట్టర్, వాట్సాప్ ద్వారా సందేశం పంపారు. తన పేరుతో వచ్చిన ఫ్రెండ్ రిక్వెస్ట్ లను ఎవరూ.. అంగీకరించవద్దని.. పొరపాటున ఎవరైనా అంగీకరించినా... వెంటనే తొలగించాలని ముత్తు కోరారు. ఫేస్​బుక్ ద్వారా తన పేరుతో ఎవరైనా డబ్బులు అడిగినా ఇవ్వొద్దని.. తన దృష్టికి తీసుకురావాలని ట్రాఫిక్ సీఐ ముత్తు కోరారు.

ఇటీవల సైబర్ నేరగాళ్లు పోలీసు అధికారుల ఫేస్​బుక్ ఖాతాలను లక్ష్యంగా చేసుకుంటున్నారు. వాళ్ల పేరుతో ఖాతాలు తెరిచి స్నేహితులకు, బంధువులకు డబ్బులు పంపాల్సిందిగా సందేశాలు పంపిస్తున్నారు. వారి పట్ల అప్రమత్తంగా ఉండాలని పోలీసులు సూచించారు.

ఇదీ చూడండి :ఎదురుకాల్పుల్లో ముగ్గురు మావోయిస్టులు మృతి