కథ సుఖాంతం: చిన్నారి కిడ్నాప్​ కేసును ఛేదించిన పోలీసులు

హైదరాబాద్​లోని మాసబ్​ట్యాంక్​ వద్ద ఈనెల 9న అపహరణకు గురైన చిన్నారి కేసును పోలీసులు ఛేదించారు. సయ్యద్​ షఫీ, మహమ్మద్​ ఆఫిజ్​ అనే ఇద్దరు నిందితులను అదుపులోకి తీసుకున్నారు.

హైదరాబాద్​ నార్సింగి సమీపంలోని మెక్నంపూర్​కు చెందిన ముక్తార్ బేగం.. రెండేళ్ల కూతురుతో కలిసి భిక్షాటన చేస్తూ.. జీవనం సాగిస్తోంది. ఈ నెల 9న మసబ్​ట్యాంకులోని ఓ బ్యాంకు వద్ద పడుకుంది. అర్ధరాత్రి ఒంటి గంటకు.. ఓ వ్యక్తి ఆమె కూతురు మహీన్​ను అపహరించే ప్రయత్నం చేయగా నిలువరించింది.

కాసేపటికి నిద్రలోకి జూరుకున్న తర్వాత మరో వ్యక్తి బాలికను అపహరించి ఆటోలో తీసుకెళ్లాడు. మరుసటి రోజు ముక్తార్​ బేగం పోలీసులకు ఫిర్యాదు చేయగా.. కేసు నమోదు చేసుకుని దర్యాప్తు ప్రారంభించారు. సీసీ కెమెరాల ఆధారంగా ఆటో డ్రైవర్​ను గుర్తించిన పోలీసులు.. నిందితుల వివరాలు సేకరించి అరెస్టు చేశారు. నిందితులు బజార్​ఘాట్​కు చెందిన సయ్యద్​ షఫీ, మహమ్మద్ ఆఫిజ్​గా గుర్తించారు.