అద్దె బస్సు యజమాని ఇంటి ముందు మృతదేహంతో ఆందోళన

షాపింగ్​ కోసం వెళ్లిన ఓ వ్యక్తిని అద్దె బస్సు బలితీసుకుంది. ఈ ఘటన శనివారం రోజు కామారెడ్డిలోని హౌసింగ్​బోర్డు కాలనీ వద్ద జరిగింది. మృతుని కుటుంబానికి న్యాయం చేయాలంటూ బాధిత కుటుంబసభ్యులు బస్సు యజమాని ఇంటి ముందు మృతదేహాంతో బైఠాయించారు.

కామారెడ్డిలోని హౌసింగ్ బోర్డు కాలనీ వద్ద శనివారం జరిగిన ప్రమాదంలో ఓ వ్యక్తి మృతి చెందాడు. సిరిసిల్ల జిల్లా ముస్తాబాద్ మండలం నామాపూర్​కు చెందిన మెరుగు నర్సాగౌడ్, నారాగౌడ్​తో కలిసి... పట్టణంలో షాపింగ్ పూర్తి చేసుకుని పెద్దమల్లారెడ్డికి ద్విచక్రవాహనంపై వెళ్తున్నారు. ఈ క్రమంలో అతిథి బార్ వద్దకు రాగానే... ద్విచక్రవాహనాన్ని కామారెడ్డి నుంచి మందాపూర్​కు వెళ్తున్న ఓ అద్దె బస్సు వేగంగా వచ్చి ఢీకొంది. ఈ ఘటనలో నర్సాగౌడ్ అక్కడికక్కడే మృతి చెందగా... నారాగౌడ్​కు తీవ్ర గాయాలయ్యాయి.

సమాచారమందుకున్న పోలీసులు... క్షతాగాత్రున్ని ఆస్పత్రికి తరలించారు. నర్సాగౌడ్​ మృతదేహానికి పోస్టుమార్టం నిర్వహించారు. బాధిత కుటుంబానికి న్యాయం చేయాలని బస్సు యజమానిని బంధువులు కోరారు. అతని నుంచి ఎలాంటి స్పందన లేకపోవటం వల్ల మృతదేహాంతో పాటు బస్సు యజమాని ఇంటి ముందు బంధువులు ఆందోళనకు దిగారు. నర్సాగౌడ్​ కుటుంబానికి న్యాయం చేయాలని డిమాండ్​ చేశారు. బాధిత కుటుంబీకులు వస్తున్న విషయం తెలుసుకున్న బస్సు యజమాని... అంతకుముందే ఇంటికి తాళం వేసుకుని పరారయ్యాడు. న్యాయం జరిగే వరకు కదిలేది లేదని బాధిత కుటుంబసభ్యులు ఇంటి ముందే బైఠాయించారు.

ఇదీ చూడండి: ప్రాణాలు తీసిన రోడ్డు ప్రమాదం.. ఘటనా స్థలంలో గంజాయి లభ్యం!