కాగజ్​నగర్​లో 19 టన్నుల నల్లబెల్లం పట్టివేత

లాక్​డౌన్​తో మద్యం దుకాణాలు మూతపడ్డాయి. ఇదే అదనుగా భావించిన కొంత మంది గుడుంబా తయారీ మొదలుపెట్టారు. కుమురంభీం జిల్లా కాగజ్​నగర్​లో గుడుంబా తయారీకి అవసరమైన నల్లబెల్లం విక్రయిస్తూ కొందరు వ్యాపారులు పట్టుబడ్డారు.

కరోనాను అరికట్టేందుకు ప్రభుత్వాలు లాక్​డౌన్​ అమలు చేస్తున్నందున మద్యం దుకాణాలు మూతపడ్డాయి. ఇదే అదనుగా భావించిన కొందరు వ్యాపారులు గుడుంబా తయారీకి అవసరమైన నల్ల బెల్లాన్ని విక్రయిస్తున్నారు.

కుమురంభీం ఆసిఫాబాద్​ జిల్లా కాగజ్​నగర్ పట్టణంలో ఓ వ్యాపారి అధిక మొత్తంలో నల్లబెల్లాన్ని దిగుమతి చేసుకుంటున్నాడనే సమాచారం మేరకు ఆబ్కారీ శాఖ అధికారులు నిఘా ఉంచారు.

రాత్రి 2 గంటల సమయంలో బెల్లం రవాణా చేస్తున్న లారీని పట్టుకున్నారు. సుమారు రూ.6 లక్షల విలువైన 19 టన్నుల బెల్లం, లారీ స్వాధీనం చేసుకున్నట్లు ఆబ్కారీ సీఐ మహేందర్ సింగ్ తెలిపారు. ఇద్దరు వ్యక్తులను అదుపులోకి తీసుకున్నామని వెల్లడించారు.