యువతిపై పెట్రోల్​ పోసి నిప్పంటించిన దుండగులు!

మరో వారం రోజుల్లో ఆ యువతి పెళ్లి. ఇంతలోనే దారుణం జరిగింది. ఇంటి వరండాలో నిద్రిస్తున్న యువతిపై గుర్తు తెలియని వ్యక్తులు పెట్రోలు పోసి నిప్పంటించారని తండ్రి ఆరోపిస్తున్నారు. ఇంతకీ ఇది ప్రమాదమా? లేక నిజంగానే ఎవరైనా హత్యాయత్నం చేశారా?

ఆంధ్రప్రదేశ్​లోని చిత్తూరు జిల్లా ములకలచెరువు మండలం గట్టుకిందపల్లిలో దారుణం చోటు చేసుకుంది. వారం రోజుల్లో పెళ్లి కావాల్సిన యువతిపై గుర్తు తెలియని దుండగులు హత్యాయత్నం చేశారని యువతి తండ్రి ఆరోపించారు. వరండాలో నిద్రిస్తున్న యువతిపై పెట్రోల్​పోసి నిప్పంటించారని వెల్లడించారు. తీవ్రంగా గాయపడిన యువతిని కుటుంబసభ్యులు మదనపల్లె ప్రభుత్వాసుపత్రికి తరలించారు.

ఈ ఘటనపై బాధితురాలి కుటుంబసభ్యులు పోలీసులకు ఫిర్యాదు చేశారు. ఘటనాస్థలంలో శునకాలు, కోళ్లు మంటల్లో చనిపోయి ఉండటంతో... అగ్నిప్రమాదం జరిగి ఉంటుందన్న కోణంలోనూ పోలీసులు దర్యాప్తు చేస్తున్నారు. బాధితురాలికి మరో వారం రోజుల్లో వివాహం జరగనుండగా.. ఈ ఘటన జరగటంతో కుటుంబ సభ్యులు కన్నీరుమున్నీరుగా విలపిస్తున్నారు.

ఇదీ చదవండి:మరో ప్రాణం తీసిన ఆన్‌లైన్‌ అప్పు