మద్యం మత్తులో కన్న కొడుకునే అమ్మేసిన కసాయి తల్లి!

హైదరాబాద్​ హబీబ్​నగర్ పీఎస్ పరిధిలో మద్యం మత్తులో ఉన్న ఓ మహిళ రూ. 45 వేలకు ఓ మధ్యవర్తి ద్వారా తన కుమారుడిని విక్రయించగా.. పోలీసులు ఆమెను అదుపులోకి తీసుకున్నారు. ఆమెతో పాటు మరో ఐదుగురిని రిమాండ్​లోకి తీసుకున్నట్లు పోలీసులు వెల్లడించారు.

మద్యం మత్తులో.. తన సొంత బిడ్డనే విక్రయించిన మహిళను హైదరాబాద్ హబీబ్​నగర్ పోలీసులు అదుపులోకి తీసుకున్నారు. స్థానిక సుబాన్​పురాకు చెందిన అబ్దుల్ జోయాఖాన్, ముజాహిద్ భార్యాభర్తలు. వీరికి షేక్ అద్నాన్​ అని రెండు నెలల బాలుడు ఉన్నాడు. భర్త ఎర్రమంజిల్​ కాలనీలోని ఓ బార్​లో మేనేజర్​గా పని చేస్తున్నాడు. దంపతులిద్దరూ మద్యం తాగి గొడవపడేవారని ఏసీపీ నరేందర్​రెడ్డి తెలిపారు.

భార్యతో గొడవపడ్డ ముజాహిద్.. ఆగస్టు 3న ఇంటి నుంచి వెళ్లిపోయి 8న తిరిగొచ్చాడు. ఇంట్లో తన రెండు నెలల బాబు కనిపించకపోగా అనుమానం వచ్చి పోలీసులకు ఫిర్యాదు చేశారు. రంగంలోకి దిగిన పోలీసులకు కాలాపత్తర్​కు చెందిన సిరాజ్​ అనే మహిళకు రూ. 45 వేలకు బాలుడిని విక్రయించినట్లు తమ దర్యాప్తులో వెల్లడైంది. ఈ కేసులో ఇప్పటివరకు మొత్తం ఆరుగురిని అరెస్ట్ చేసి రిమాండ్​కు తరలించినట్లు ఏసీపీ వెల్లడించారు.

ఇదీ చదవండి:'కోజికోడ్​ విమానాశ్రయ రన్​వే సురక్షితమైనదే'