అక్రమంగా రేషన్ బియ్యం విక్రయిస్తున్న వడ్డీ వ్యాపారి అరెస్టు

అక్రమంగా రేషన్​ బియ్యం నిల్వ చేసి విక్రయిస్తున్న కమాన్పూర్​కు చెందిన వడ్డీ వ్యాపారిని పోలీసులు అరెస్టు చేశారు. పీడీఎస్​ బియ్యం, ప్రామిసరీ నోట్​లు, చెక్కులు స్వాధీనం చేసుకున్నట్టు గోదావరిఖని ఏసీపీ ఉమేందర్ తెలిపారు.

పెద్దపల్లి జిల్లా కమాన్పూర్​కు చెందిన కోలేటి మహేశ్ అలియాస్ అప్పాల మహేశ్​ను పోలీసులు అరెస్టు చేశారు. కొంతకాలంగా రేషన్​ బియ్యాన్ని అక్రమంగా అధిక ధరలకు అమ్ముతున్నారనే సమాచారంతో... అతని ఇంటిపై సీఐ శ్రీనివాస్, శ్యాం పటేల్​ తన సిబ్బందితో దాడి చేశారు. అక్రమంగా నిల్వ ఉంచిన 18 క్వింటాళ్ల పీడీఎస్​ బియ్యాన్ని స్వాధీనం చేసుకున్నట్టు తెలిపారు.

ఇంట్లో సోదాలు చేయగా... ప్రజల అవసరాలను ఆసరాగా చేసుకుని 120 మందికి అధిక వడ్డీలకు డబ్బులు ఇచ్చిన ప్రామిసరీ నోట్లు, చెక్కులు లభించాయి. బియ్యం, చెక్కులు, ప్రామిసరీ నోట్​లు సీజ్​ చేసినట్టు గోదావరిఖని ఏసీపీ ఉమేందర్​ తెలిపారు. అతనిపై పలు సెక్షన్ల కింద క్రిమినల్ కేసులు నమోదు చేసినట్టు వెల్లడించారు. గోదావరిఖని కేంద్రంగా వడ్డీ వ్యాపారాలు నడిపిన వారిపై గతంలోనూ ఉక్కుపాదం మోపామని, ఇలాంటి వారెవరైనా ఉంటే ప్రజలు నిర్భయంగా పోలీసులకు ఫిర్యాదు చేస్తే శిక్ష పడేలా చూస్తామన్నారు.