20 గొర్రెలను బలి తీసుకున్న పాలవ్యాన్​

రోడ్డు వెంబడి ప్రశాంతంగా వెళ్తున్న గొర్రెలను ప్రమాదం పేరుతో పాలవ్యాన్​ కాటేసింది. వేగంతో దూకుకొచ్చిన వాహనం ఆ జీవాలను ఢీకొట్టింది. ప్రమాదంలో 20 గొర్రెలు అక్కడికక్కడే మృత్యువాత చెందాయి. ఈ ఘటన కరీంనగర్ జిల్లాలో చోటుచేసుకుంది.

కరీంనగర్ జిల్లా తిమ్మాపూర్ మండలంలోని రాజీవ్ రహదారిలో రామకృష్ణ కాలనీ వద్ద వేగంగా వచ్చిన పాలవ్యాన్ రోడ్డు వెంబడి వెళ్తున్న గొర్రెల మందపై దూసుకెళ్లింది. ఘటనలో 20 గొర్రెలు అక్కడికక్కడే మృతి చెందాయి. మరి కొన్నింటికి గాయాలయ్యాయి.

మహబూబ్​నగర్ జిల్లాకు చెందిన గొర్ల కాపరి వెంకటేష్ కరీంనగర్ వైపు నుంచి సిద్దిపేటకు జీవాలను తీసుకుని వెళ్తున్నాడు. ఆ క్రమంలో తిమ్మాపూర్ మండలంలోని రామకృష్ణ కాలనీకి చేరుకోగానే కరీంనగర్ డైరీకి చెందిన పాలవ్యాన్​ వేగంగా వచ్చి గొర్రెల మందను ఢీకొట్టింది. ప్రమాదంలో 20 గొర్రెలు అక్కడికక్కడే మరణించాయి.

స్థానికులు డ్రైవర్​పై తీవ్ర ఆగ్రహం వ్యక్తం చేశారు. బాధితుడికి నష్టపరిహారం అందించాలని రాజీవ్ రహదారిపై బైఠాయించి ధర్నా చేశారు. ఎల్ఎండీ ఎస్​ఐ కృష్ణారెడ్డి ఘటన స్థలానికి చేరుకుని వారికి నచ్చజెప్పి ట్రాఫిక్​ను క్రమబద్ధీకరించాడు. పాలవరం యజమాని సంబంధీకులు వచ్చి 1,20,000 పరిహారం అందజేస్తామని హామీ ఇవ్వడం వల్ల సమస్య సద్దుమణిగింది.

ఇదీ చూడండి :అంతర్రాష్ట్ర ముఠా అరెస్ట్.. ఆయుధాలు, వాహనాలు స్వాధీనం