బాలుడి కిడ్నాప్​ కథ సుఖాంతం

ఏ ఆసరా లేని ఓ తల్లి తన బిడ్డే లోకంగా బతుకుతోంది. బతుకుదెరువు లేక బిక్షాటన చేస్తూ కంటికి రెప్పలా కాపాడుకుంటోన్న ఆ చిన్నారి అపహరణకు గురైంది. తల్లి వేదన ఆర్థం చేసుకున్న పోలీసులు గంటల వ్యవధిలోనే బిడ్డను తల్లి అక్కున చేర్చారు.

హైదరాబాద్ చాదర్ ఘాట్ ప్రాంతంలో రోహిణి అనే మహిళ తన సంవత్సరన్నర వయస్సు గల కుమారుణ్ని ఎవరో అపహరించారని చాదర్​ఘాట్​ పోలీసులకు ఫిర్యాదు చేసింది. అడిషనల్ టాస్క్ ఫోర్స్ డీసీపీ చక్రవర్తి అదేశాలతో రంగంలోకి దిగిన ఈస్ట్ జోన్ టాస్క్ ఫోర్స్ పొలీసులు ఆ ప్రాంతాని క్షుణ్నంగా పరిశీలించారు.

ఓ వ్యక్తి చిన్నారిని ఎత్తుకెళ్లాడని సీసీటీవి ద్వారా గుర్తించారు. ఆ వ్యక్తి పాతబస్తీ తలాబ్ కట్ట ప్రాంతానికి చెందినవాడని నిర్ధరణకు వచ్చారు. అతణ్నిఅదుపులోకి తీసుకుని తమదైన శైలిలో విచారించగా.. చిన్నారిని కిడ్నాప్​ చేసినట్లు ఒప్పుకున్నాడు. కొన్ని గంటల్లోనే చిన్నారిని తల్లి చెంతకు చేర్చిన ఈస్ట్ జోన్​ పోలీసులను డీసీపీ అభినందించారు.