సైబర్ నేరస్థులు పోలీసులకు సవాల్గా మారుతున్నారు. పోలీసుల పేర్లు, ఫొటోలతో నకిలీ ఖాతాలను తెరచి నయా మోసానికి తెర తీస్తున్నారు. తాజాగా ఏపీలోని కృష్ణా జిల్లా జగ్గయ్యపేట సీఐ చంద్రశేఖర్ పేరుపై నకిలీ ఫేస్బుక్ ఖాతాను తెరిచారు. అత్యవసరంగా తనకు 10 వేల రూపాయలు కావాలని అకౌంట్కు నగదు పంపాలని స్నేహితులకు మెస్సేజ్ పంపారు . స్నేహితులు ఇన్స్పెక్టర్కు ఫోన్ చేసి అడగ్గా... సైబర్ నేరస్థుల నకిలీ ఖాతాల గుట్టు బయటపడింది . తన పేరుపై ఉన్న ఫేస్బుక్ ఖాతా నకిలీదని... ఎవ్వరూ నగదు పంపవద్దని సీఐ చంద్రశేఖర్ తెలిపారు.
ఈ తరహాలోనే విజయవాడ కమిషనరేట్ పరిధిలో నెలరోజుల్లో 20 ఫిర్యాదులు వచ్చాయని సైబర్ క్రైమ్ పోలీసులు చెపుతున్నారు . అత్యవసరంగా నగదు కావాలని ఫేస్ బుక్ లో పోలీసు అధికారుల పేర్లతో ఎవరైనా మెస్సేజ్ పంపితే .. సంబంధిత అధికారికి ఫోన్ చేసి నిర్ధారించుకోవాలని సైబర్ క్రైం పోలీసులు సూచిస్తున్నారు.
ఇదేవిధంగా ప్రకాశం జిల్లాలో ఎస్పీ సిద్ధార్ధ్ కౌశల్, ఇతర అధికారుల పేర్లతో నకిలీఖాతాలు సృష్టించినట్లు వెలుగులోకి వచ్చింది. తెలంగాణలోని నల్గొండ ఎస్పీ ఏవి రంగనాథ్‌ పేరుతో నకిలీ ఖాతాను సృష్టిస్తే కేసు నమోదు చేసి నిందితులను అరెస్ట్ చేశారు. సైబర్ కేసుల్లో నిందితులను పట్టుకోవటం పోలీసులకు ప్రహసనంగా మారుతుంది . ఇదే అదునుగా చూసుకుని నేరస్థులు రెచ్చిపోతున్నారు.
ప్రస్తుతం కోట్లమంది ప్రజలు ఫేస్బుక్ను వినియోగిస్తున్నారు. జాగ్రత్తలు పాటించకపోతే ఫేస్బుక్ ఖాతాను హ్యాక్ చేసి అందులోని ఫొటోలు, వీడియోలు తస్కరించే అవకాశముంటుందని నిపుణులు హెచ్చరిస్తున్నారు. పటిష్టమైన పాస్వర్డ్, రెండంచెల అథంటికేషన్, సెక్యూరిటీ సెట్టింగ్స్లో జాగ్రత్తలు పాటిస్తే పూర్తిస్థాయి రక్షణ ఉంటుందని చెపుతున్నారు. వినియోగదారులు జాగ్రత్తలు పాటించకపోతే ఫేస్బుక్ హ్యాక్ చేసి సైబర్ నేరస్థులు అక్రమకార్యకలాపాలకు వినియోగిస్తారని హెచ్చరిస్తున్నారు.
