కామారెడ్డి జిల్లా కేంద్రం అశోక్నగర్లోని ఓ మూసి ఉన్న పాఠశాలలో మందుబాబులు హల్చల్ చేశారు. స్కూల్ గ్రౌండ్లో.. కర్రలు, రాళ్లతో కొట్టుకుంటూ విధ్వంసం సృష్టించారు. ఇది చూసిన కాలనీ వాసులు ఒక్కసారిగా భయబ్రాంతులకు గురయ్యారు. ఆ మేరకు పోలీసులకు సమాచారమిచ్చారు.
ఏం జరిగిందంటే?
స్థానిక వాసవి పాఠశాల ఆకతాయిలకు అడ్డాగా మారింది. కొవిడ్ నేపథ్యంలో మూతపడిన ఈ పాఠశాల మైదానంలో మందుబాబులు నిత్యం మద్యం సేవిస్తూ హల్చల్ చేస్తున్నారు.
రోజు మాదిరిగానే ఒకచోట చేరిన ఆకతాయిలు.. డబ్బుల విషయంలో గొడవ పడ్డట్లు తెలుస్తోంది. ఇరు వర్గాలకు చెందిన యువకులు పెద్ద ఎత్తున అక్కడకు చేరుకుని కర్రలు, రాళ్లతో కొట్టుకున్నారు. దాంతో ఒక్కసారిగా అక్కడ ఘర్షణ వాతవరణం ఏర్పడింది. భయబ్రాంతులకు గురైన స్థానికులు.. పోలీసులకు ఫిర్యాదు చేశారు.
పోలీసులు ఘటన స్థలానికి చేరుకొనేలోపే ఆకతాయిలు అక్కడినుంచి పరారయ్యారు. ఇలాంటి వారిపై కఠిన చర్యలు తీసుకోవాలని స్థానికులు విఙప్తి చేస్తున్నారు.