ఇంజినీరింగ్ ప్రొఫెసర్... ఏకంగా 15 సార్లు ఓటీపీ చెప్పిన వైనం

ఆయనో ఇంజినీరింగ్ కళాశాలలో ప్రొఫెసర్​గా పని చేస్తున్నారు. క్రెడిట్ కార్డుకు రివార్డ్​ పాయింట్లు మీ ఖాతాలో జమ చేసుకోవడానికి మేం చెప్పినట్లు మీరు చేయండంటూ సైబర్ నేరగాళ్లు వల వేశారు. అందులో చిక్కుకొని 15సార్లు ఓటీపీ చెప్పేశారు. సదరు వ్యక్తి ఖాతా నుంచి రూ. 2.8 లక్షలు సైబర్ నేరగాళ్లు కాజేశారు.

హైదరాబాద్​ విద్యానగర్​కు చెందిన ఓ వ్యక్తి నగర శివారు ప్రాంతంలోని ఓ ఇంజినీరింగ్ కాలేజీలో ప్రొఫెసర్​గా పని చేస్తున్నారు. ఆంధ్రా బ్యాంకు, ఐసీఐసీఐ, స్టాండర్డ్ ఛార్టెడ్ బ్యాంక్​లకు సంబంధించిన క్రెడిట్ కార్డులు కలిగి ఉన్నారు. కాగా తాము స్టాండర్డ్ చార్డెట్ బ్యాంక్​ నుంచి మాట్లాడుతున్నామంటూ గుర్తు తెలియని వ్యక్తులు ఫోన్ చేశారు.

మీ క్రెడిట్ కార్డుకు రివార్డ్​ పాయింట్లు వచ్చాయి. వాటిని మీ ఖాతాలో జమ చేసుకోవాలంటే ప్రాసెస్ ఉందని... మీరు వివరాలు చెబితే మేం పూర్తి చేస్తామంటూ చెప్పగా... ప్రొఫెసర్ కేటుగాళ్ల మాటలు నమ్మేశారు. అడిగినట్లుగా కార్డు వివరాలు, సీవీవీ నంబర్​తో సహా చెప్పేశాడు. అంతటితో ఆగకుండా మీ ఫోన్​కు మెసేజ్ వస్తుందని... అందులో ఉండే నంబర్ చెబితే ప్రాసెసింగ్ పూర్తవుతుందని సూచించగా సెల్​ఫోన్​కు వచ్చిన ఓటీపీ నంబర్​ను చెప్పేశాడు. ఒక్కసారి కాదు ఏకంగా 15సార్లు తన సెల్​ఫోన్​కు వచ్చిన ఓటీపీని సైబర్ నేరగాళ్లకు చెప్పేశారు.

మీరు బాధ్యత గల ప్రొఫెసర్​ కదా కనీసం ఓటీపీ చెప్పొద్దనే ఆలోచన మీకు రాలేదా అంటూ పోలీసులు ప్రశ్నిచగా... తాను ఫోన్​లో మాట్లాడుతున్నానని... ఆలోచించకుండా అడిగిన వివరాలు చెబుతూ వెళ్లానంటూ చెప్పుకొచ్చారు. బాధితుడి ఫిర్యాదు మేరకు కేసు నమోదు చేసుకొని సైబర్ క్రైమ్ పోలీసులు దర్యాప్తు చేస్తున్నారు.

ఇవీచూడండి:కొవిడ్‌ వైద్యులకు విరామం ఇవ్వరా?