రోగుల వద్ద కరోనా మందులు కొట్టేసి.. బ్లాక్​లో అమ్మే ముఠా అరెస్ట్

కొవిడ్​-19 మందులకు అధిక ధరలకు విక్రయిస్తున్న ఓ మెడికల్​ షాపు యజమానిని టాస్క్​ఫోర్స్​ పోలీసులు అరెస్ట్​ చేశారు. నగరంలోని పలు ప్రైవేటు ఆస్పత్రుల్లో పనిచేసే కొందరు సిబ్బంది కరోనా రోగులకు ఇచ్చే మందులను దొంగలించి మెహ‌దీప‌ట్నంలోని ఓ మందుల దుకాణంలో విక్రయిస్తున్నారు. రంగంలోకి దిగిన టాస్క్​ఫోర్స్​ పోలీసులు మొత్తం ఎనిమిది మందిని అదుపులోకి తీసుకున్నారు.

కొవిడ్ రోగుల వ‌ద్ద కొట్టేసిన ఇంజెక్ష‌న్లు, మందులను కొనుగోలు.. చేసి అధిక ధ‌ర‌ల‌కు విక్ర‌యిస్తున్న ఓ మెడిక‌ల్ దుకాణం య‌జ‌మానిని టాస్క్​ఫోర్స్​ పోలీసులు అరెస్టు చేశారు. ఈ కేసులో మెహ‌దీప‌ట్నంలోని ఓ మందుల షాపు యజమానితో పాటు నగరంలోని వివిధ ఆస్పత్రుల్లో పనిచేసే మరో ఏడుగురిని పోలీసులు అదుపులోకి తీసుకున్నారు.

మెహ‌దీప‌ట్నం ప్రాంతంలోని ఆలివ్ ప్రైవేట్ ఆసుపత్రిలో వార్డ్ బాయ్​గా పనిచేస్తున్న రవి రాజు, అజిస్.. సమీరా ఆస్పత్రిలో పనిచేసే ఒబేద్ అలీ, అశ్వక్ అలీ, ఎల్బీన‌గ‌ర్‌లోని ఓ ప్రైవేటు ఆసుపత్రిలో పనిచేసే సునీల్ మ‌రో సేల్స్‌మెన్ మజీద్ వీరంతా ఇన్‌ పేషెంట్‌గా ఉన్న కొవిడ్ రోగుల వ‌ద్ద నుంచి ఇంజెక్ష‌న్లు, మందుల‌ను దొంగిలిస్తున్నారు.

కొట్టేసిన ఇంజెక్ష‌న్లు, మందులను మెహ‌దీప‌ట్నంలోని ఓ మెడిక‌ల్ దుకాణంలో అమ్మేవారు. మెడిస‌ిన్ ఖ‌రీదు రూ. 4,500 అయితే బ్లాక్‌లో రూ. 25 వేల నుంచి రూ. 35 వేల వ‌ర‌కు విక్ర‌యిస్తూ సొమ్ము చేసుకుంటున్నారు. పక్కా సమాచారంతో రంగంలోకి దిగిన టాస్క్​ఫోర్స్​ పోలీసులు వీరందరిని అదుపులోకి తీసుకున్నారు.