కుటుంబ పోషణ కోసం గంజాయి దందా

జేసీబీ డ్రైవర్​గా వచ్చే డబ్బు.. కుటుంబ పోషణకు సరిపోక గంజాయి దందా మొదలుపెట్టాడు ఓ వ్యక్తి. రూ. 5 వేలకు రెండు కేజీల గాంజా కొనుగోలు చేసి రూ. 10 నుంచి 12 వేల వరకు అమ్మేవాడు. అయితే పక్కా సమాచారం అందుకున్న పోలీసులు రెక్కీ నిర్వహించి.. నిందితున్ని అదుపులోకి తీసుకున్నారు.

హైదరాబాద్​లో గంజాయి దందా మళ్లీ ఊపందుకుంది. గోపాలపురం పోలీస్ స్టేషన్ పరిధిలోని గణేశ్​ లాడ్జ్ ఎదురుగా గంజాయి అమ్ముతున్నారనే కచ్చితమైన సమాచారంతో వెస్ట్ జోన్ టాస్క్ ఫోర్స్ పోలీసులు రెక్కీ నిర్వహించారు. 54 కిలోల గంజాయి స్వాధీనం చేసుకుని ఐదుగురిని అదుపులోకి తీసుకున్నారు.

ఏ1 నిందితుడు శివ జేసీబీ డ్రైవర్​గా పని చేసేవాడు. అయితే వచ్చే డబ్బు కుటుంబ పోషణకు సరిపోక.. విశాఖపట్నం నుంచి గంజాయి తెచ్చి హైదరాబాద్​లో విక్రయించాలని నిర్ణయించుకున్నాడు. తన స్నేహితుల సహాయంతో విశాఖలో రూ. 5 వేలకు రెండు కేజీలు కొనుగోలు చేసి.. హైదరాబాద్​లో రూ. 10 నుంచి 12 వేలకు అమ్మేవాడు.

ఈ క్రమంలోనే మంగళవారం టాస్క్ ఫోర్స్ పోలీసులు రెక్కీ నిర్వహించి.. ఐదుగురిని పట్టుకున్నారు. ఒక ఆటో, రూ. 25 వేల నగదు, 7 చరవాణీలు స్వాధీనం చేసుకున్నారు. అనంతరం గోపాలపురం పోలీస్ స్టేషన్​లో నిందితులను అప్పగించారు.

ఇదీ చదవండి:ఆ కేఫ్​లో గంజాయి కలిపిన బీరుకు సూపర్​ క్రేజ్​!