ప్రాజెక్టును చూసేందుకు వెళ్తుండగా ప్రమాదం.. ఇద్దరి పరిస్థితి విషమం

అతివేగం వారి సంతోషానికి అడ్డుకట్ట వేసింది. ప్రాజెక్టును చూసేందుకు వెళ్తుండగా ఆ మిత్రులను ప్రమాదం కబళించింది. ఎంతో సంతోషంగా గడుపుదామనుకుని కారులో బయలుదేరిన ఆరుగురిలో ఇద్దరి పరిస్థితి విషమంగా మారింది. మరో నలుగురికి స్వల్ప గాయాలయ్యాయి.

అతివేగంగా వెళ్తున్న ఓ కారు బోల్తా పడిన ఘటనలో ఆరుగురు యువకులు గాయపడ్డారు. ఇద్దరి పరిస్థితి విషమించడంతో హైదరాబాద్ ఆసుపత్రికి తరలించారు. కోట్​పల్లి ప్రాజెక్టును చూసేందుకు వెళ్తుండగా ప్రమాదం చోటుచేసుకుంది.

రంగారెడ్డి జిల్లా శంషాబాద్​కు చెందిన ఐదుగురు యువకులు కారులో వికారాబాద్​లోని మిత్రుడి ఇంటికి వెళ్లారు. అక్కడి నుంచి ఆరుగురు యువకులు అనంతగిరి కోట్​పల్లి ప్రాజెక్టును చూసేందుకు వెళ్తుండగా.. అనంతగిరి ఘాట్ రోడ్డు మలుపులో కారు అదుపుతప్పి బోల్తా కొట్టింది.

కారులో ఉన్న పవన్, ముఖేశ్​లు తీవ్రంగా గాయపడగా.. మరో నలుగురికి స్వల్ప గాయాలయ్యాయి. వీరందరిని వికారాబాద్​లోని ప్రభుత్వ ఆసుపత్రిలో చికిత్స అందించారు. అనంతరం తీవ్రంగా గాయపడిన పవన్, ముఖేశ్​ను హైదరాబాద్​లోని ఓ ప్రైవేట్ ఆసుపత్రికి తరలించారు.

ఇదీ చూడండి: కిటికీ ఊచలు కట్ చేసి చోరీ.. బంగారం,వెండి,నగదు అపహరణ