చెరువులో పడి మతిస్థిమితం లేని వ్యక్తి మృతి

ప్రమాదవశాత్తు చెరువులో పడి మతిస్థిమితం సరిగా లేని వ్యక్తి మృతి చెందాడు. ఈ ఘటన నారాయణపేట జిల్లాలో చోటుచేసుకుంది.

నారాయణపేట జిల్లా మక్తల్ మండలం జోలపురంలో విషాదం చోటుచేసుకుంది. స్థానికంగా ఉన్న చెరువులో పడి వెంకటేష్​ అనే వ్యక్తి మృతి చెందాడు. ధన్వాడ మండలం గున్ముక్ల గ్రామానికి చెందిన వెంకటేష్​కు మానసిక పరిస్థితి సరిగా లేదు. దీనికి తోడు మూర్ఛ వ్యాధి ఉంది. ఈ క్రమంలోనే 2 రోజుల క్రితం ఇంటి నుంచి బయటకు వెళ్లిన వెంకటేష్..​ జోలపురంలోని చెరువులో శవమై కనిపించాడు.

వెంకటేష్​ కాలకృత్యాలకు వెళ్లి మూర్ఛ రావడంతో చెరువులో పడి మృతి చెంది ఉంటాడని మక్తల్​ ఎస్సై రాములు పేర్కొన్నారు. ఘటనకు సంబంధించి మరిన్ని వివరాలు తెలియాల్సి ఉందన్నారు. ఈ మేరకు కేసు నమోదు చేసుకుని దర్యాప్తు చేస్తున్నట్లు వివరించారు. మృతదేహాన్ని పోస్టుమార్టం నిమిత్తం మక్తల్ ప్రభుత్వ ఆసుపత్రికి తరలించారు.