మాజీ ఎమ్మెల్యే కుమారుడు, అనుచరులపై కేసు నమోదు

ఏపీలోని పొద్దుటూరు మాజీ ఎమ్మెల్యే వరదరాజులు రెడ్డి కుమారుడు కొండారెడ్డిపై బంజారాహిల్స్​ పోలీస్​ స్టేషన్​లో కేసు నమోదైంది. స్థలం విషయంలో కొండారెడ్డి తనని బెదిరించాడని శివ గణేశ్​​ అనే వ్యాపారి ఫిర్యాదు చేయగా అతనితో పాటు మరో 17మందిపై పోలీసులు కేసు నమోదు చేశారు.

ఆంధ్రప్రదేశ్​లోని పొద్దుటూరు మాజీ ఎమ్మెల్యే వరదరాజులు రెడ్డి కుమారుడు కొండారెడ్డిపై బంజారాహిల్స్ పోలీస్​ స్టేషన్​లో కేసు నమోదైంది. హైదరాబాద్‌ శ్రీనగర్ కాలనీకి చెందిన వ్యాపారి శివ గణేశ్​​.. తనకి చెందిన రెండున్నర ఎకరాల స్థలాన్ని కొండారెడ్డి బెదిరించి ఆయన పేరిట రాయించుకున్నారని ఫిర్యాదులో పేర్కొన్నారు. దీంతో కొండారెడ్డితో పాటు మరో 17మందిపై పోలీసులు కేసు నమోదు చేశారు.

బెదిరించి మరీ రిజిస్ట్రేషన్..​

పొద్దుటూరులో శివ గణేశ్​కు రెండున్నర ఎకరాల స్థలం ఉంది. ఈ స్థలం వివాదంలో ఉండటంతో వరదరాజులు రెడ్డి బంధువు రామచంద్రారెడ్డిని శివ గణేశ్​ సంప్రదించాడు. వివాదం పరిష్కరిస్తే ఎకరం స్థలం ఇస్తానంటూ ఒప్పందం కుదుర్చుకున్నాడు. దీంతో రామచంద్రారెడ్డి వివాదం పరిష్కరించారు. కాగా ఎకరం స్థలంతో పాటు మిగిలిన స్థలాన్నీ తమకు రిజిస్టర్​ చేయాలంటూ 9 నెలలుగా వ్యాపారిని కొండారెడ్డి బెదిరిస్తూ వచ్చారు.

గత నెల 26న కొండారెడ్డి గన్‌మెన్​తో పాటు మరికొంతమంది అనుచరులను తీసుకొని శ్రీనగర్ కాలనీలోని శివ గణేశ్​ కార్యాలయానికి వెళ్లి బెదిరించారు. దీంతో ఎకరం స్థలం రిజిస్టర్ చేసుకోవాలంటూ మంగళవారం ఎర్రమంజిల్ కార్యాలయానికి రావాలని వ్యాపారి తెలిపాడు. రామచంద్రారెడ్డి, రవి రెడ్డి, ఇద్దరు గన్​మెన్లతో పాటు 15 మంది అనుచరులతో కలిసి అతన్ని బెదిరించి మొత్తం స్థలాన్ని కొండారెడ్డి తన పేరిట రాయించుకున్నారు. దీనిపై గణేశ్​ బంజారాహిల్స్ పోలీసులకు ఫిర్యాదు చేయగా కొండారెడ్డి, రామచంద్రారెడ్డి, రవి రెడ్డిలతో పాటు మరో 15 మందిపై కేసు నమోదు చేసి దర్యాప్తు చేస్తున్నారు.

ఇదీ చదవండి:అక్రమంగా రవాణా చేస్తున్న 105 క్వింటాళ్ల రేషన్​బియ్యం స్వాధీనం