పైపును సరి చేస్తున్న క్రమంలో విద్యుదాఘాతంతో మృతి

పదో తరగతి చదువుతున్న హరీశ్‌ కరోనా కారణంగా ఇంటి వద్దే ఉంటున్నాడు. తండ్రికి చేదోడువాదోడుగా ఉంటూ సాయపడుతున్నాడు. ఇదే క్రమంలో పొలం దగ్గరకి వెళ్లి మోటారు పెట్టాడు. పైపును సరి చేస్తున్నాడు. అంతే ఒక్కసారిగా విద్యుదాఘాతానికి గురయ్యాడు. తల్లిదండ్రులకు తీరని విషాదాన్ని మిగిల్చి అనంతలోకాలకు వెళ్లిపోయాడు. ఈ విషాద ఘటన మహబూబాద్ జిల్లా దంతాలపల్లి మండలంలో జరిగింది.

మహబూబాబాద్ జిల్లా దంతాలపల్లి మండల కేంద్రంలో విద్యుదాఘాతంతో 10వ తరగతి చదువుతున్న విద్యార్థి మృత్యువాత పడ్డాడు. గ్రామానికి చెందిన ఎల్లు హరీశ్‌(15) విద్యుత్ మోటారు పెట్టి.. పైపును సరి చేస్తున్న క్రమంలో దుర్మరణం చెందాడు.

గ్రామానికి చెందిన ఎల్లు నాగేశ్‌, ఉమ దంపతులకు ఇద్దరు కుమారులు. వీరి పెద్ద కుమారుడు హరీశ్‌. తొర్రూరులోని ఒక ప్రైవేటు పాఠశాలలో పదో తరగతి చదువుతున్నాడు. కరోనా కారణంగా ఇంటి వద్దే ఉంటూ వ్యవసాయ పనుల్లో తండ్రికి తోడుగా నిలుస్తున్నాడు. మధ్యాహ్నం దుక్కికి నీరు పెట్టేందుకు వ్యవసాయ పొలం వద్దకు వెళ్లాడు. బోరు బావి మోటార్ పెట్టిన అనంతరం నీళ్లు పొసే పైపును సరి చేస్తున్న క్రమంలో ప్రమాదవశాత్తు విద్యుదాఘాతానికి గురై అక్కడికక్కడే మృతి చెందాడు.

తల్లి ఉమ, అమ్మమ్మ నర్సమ్మ.. హరీశ్‌ మృతదేహంపైపడి రోదించిన తీరు గ్రామస్థులకు కంటతడి పెట్టించింది. పోలీసులు ఘటనా స్థలాన్ని పరిశీలించారు. మృతదేహాన్ని పోస్టుమార్టం నిమిత్తం మహబూబాబాద్‌లోని ప్రాంతీయ ఆస్పత్రికి తరలించారు. కేసు నమోదు చేసి ప్రమాదానికి గల కారణాలపై దర్యాప్తు చేపట్టినట్లు ఎస్ఐ బానోత్ వెంకన్న తెలిపారు.

ఇదీ చూడండి: వృద్ధురాలిని హత్య చేసి అదే ఇంట్లో పూడ్చి పెట్టారు!