సిరియాలో కారు బాంబు దాడులు- 12 మంది మృతి

రెండు వేర్వేరు చోట్ల జరిగిన కారు బాంబు దాడుల్లో సిరియాకు చెందిన 12 మంది మృతి చెందారు. మరోవైపు కుర్దిష్ భద్రతా​ బలగాలు జరిపిన కాల్పుల్లో ఓ సిరియా పౌరుడు మరణించాడు.

రెండు గంటల వ్యవధిలోనే సిరియాలోని రెండు వేర్వేరు చోట్ల కారు బాంబు దాడులు జరిగాయి. ఈ ఘటనల్లో మొత్తం 12 మంది దుర్మరణం చెందారు.

సిరియా తిరుగుబాటు దారుల అధీనంలో ఉన్న అజాజ్​ ప్రాంతంలో తొలి కారు బాంబు దాడి జరిగింది. ఈ ఘటనలో చిన్నారి సహా ఆరుగురు పౌరులు ప్రాణాలు కోల్పోయారు. అజాజ్​కు 30 మైళ్ల దూరంలో ఉన్న ఓ గ్రామంలో జరిగిన మరో పేలుడులో ఆరుగురు ఫైటర్లు చనిపోయారు.

వాయవ్య సిరియాలో ఇటీవలి కాలంలో పేలుడు ఘటనలు పెరిగిపోతున్నాయి. జనవరి ప్రారంభం నుంచి పేలుళ్లు జరగడం ఇది 11వ సారి అని మీడియా వర్గాలు తెలిపాయి.

కుర్దిష్​ బలగాల కాల్పుల్లో..

మరోవైపు.. ప్రభుత్వ అనుకూల నినాదాలు చేస్తున్న నిరసనకారులపై కుర్దిష్​ భద్రతా బలగాలు కాల్పులు జరిపాయి. ఈ ఘటనలో ఓ సిరియా పౌరుడు చనిపోయాడు. మరో నలుగురు గాయపడ్డారు.