దుబాయిలోని బాంబే బరో అనే భారతీయ రెస్టారెంట్ 'రాయల్‌ గోల్డ్‌ బిర్యానీ' పేరుతో ప్రత్యేక బిర్యానీని విక్రయిస్తోంది. దీని ప్లేట్‌ ధర 1000 దిర్హామ్‌లు. అంటే భారత కరెన్సీలో దాదాపు రూ. 19,700. ఈ బిర్యానీని 23 కేరట్ల తినే బంగారంతో గార్నిష్‌ చేసి వడ్డిస్తారు. అందుకే దీనికి గోల్డ్‌ బిర్యానీ అని పేరుపెట్టారు. ఇదొక్కటే కాదు.. ఇందులో చాలా ప్రత్యేకతలున్నాయి.
సాధారణంగా బిర్యానీలో ఒకేరకంగా ఉండే అన్నం ఉంటుంది. కానీ 'రాయల్‌ గోల్డ్‌ బిర్యానీ'లో బిర్యానీ రైస్‌, కీమా రైస్‌, కుంకుమపువ్వు అన్నం ఉంటాయి. దానిపై ఉడకబెట్టిన గుడ్లు, చిన్న బంగాళాదుంపలు, జీడిపప్పు, దానిమ్మ గింజలు తదితరవాటిని ఉంచుతారు. కశ్మీరీ గొర్రె కబాబ్స్‌, ఓల్డ్‌ దిల్లీ కబాబ్స్‌, రాజ్‌పుత్‌ చికెన్‌ కబాబ్స్‌, మొఘలాయి కోఫ్తా వంటి మాంసం ముక్కలను పెట్టి వాటిపై 23 కేరట్ల తినే బంగారాన్ని అలంకరిస్తారు. బిర్యానీతో పాటు నిహారీ సలాన్‌, జోధ్‌పురి సలాన్‌, బాదామీ సాస్‌, రైతా ఇస్తారు.