Latakia Port Attack: సిరియాలోని లటాకియా నౌకాశ్రయంపై ఇజ్రాయెల్ యుద్ధవిమానాలు క్షిపణుల దాడి చేసినట్లు ఆ దేశం తెలిపింది. అయితే ఈ దాడుల్లో ఎలాంటి ప్రాణనష్టం వాటిల్లలేదని స్పష్టంచేసింది. పోర్ట్లోని కంటైనర్ ప్రాంతంలో అనేక క్షిపణులను ఇజ్రాయెల్ ప్రయోగించిందని సిరియాకు చెందిన ఓ మిలిటరీ అధికారి.. స్థానిక మీడియాసంస్థకు వివరించారు. ఇదే విషయంపై పూర్తివివరాలను మాత్రం వెల్లడించలేదు.
లటాకియా పోర్ట్పై ఇది ఒక అరుదైన దాడిగా అక్కడి ప్రభుత్వం చెబుతోంది. ఈ నౌకాశ్రయం నుంచే సిరియా దిగుమతి చేసుకున్న ఉత్పత్తులు దేశవ్యాప్తంగా సరఫరా అవుతాయి. లటాకియా పోర్ట్లో మొత్తం ఐదు పేలుళ్లు జరిగినట్లు సిరియాలోని టీవీ తెలిపింది. కంటైనర్లు ఉన్నప్రాంతంలో పెద్దఎత్తున మంటలు చెలరేగినట్లు పేర్కొంది. అయితే ఈ ఘటనపై ఇజ్రాయెల్ ప్రభుత్వం స్పందించలేదు.