ఫక్రజాదే హత్యకు ప్రతీకారం తీర్చుకుంటాం: ఇరాన్

ఇరాన్ శాస్త్రవేత్త మొసిన్ ఫక్రజాదే హత్యకు తగిన ప్రతీకారం తీర్చుకుంటామని హసన్ రౌహానీ స్పష్టం చేశారు. ఆయన మరణం దేశంలోని అణు కార్యక్రమాలను ఆపలేదని తేల్చి చెప్పారు. హత్యకు కారణం ఇజ్రాయెలే అని ఆరోపించారు.

ఇరాన్​కు సైనిక అణు శాస్త్రవేత్త మొసిన్ ఫక్రజాదేహత్యకు తగిన ప్రతీకారం తీర్చుకుంటామని ఆ దేశ అధ్యక్షుడు హసన్ రౌహానీ పేర్కొన్నారు. ఆయన హత్యకు ఇజ్రాయెలే కారణమని ఉద్ఘాటించారు. కరోనా టాక్స్​ఫోర్స్​కు సంబంధించిన ప్రభుత్వ సమావేశంలో పాల్గొన్న రౌహానీ.. ఫక్రజాదే మరణించినప్పటికీ దేశంలోని అణు కార్యక్రమాలు ఆగబోవని స్పష్టం చేశారు.

"అమరవీరుడు ఫక్రజాదే హత్యపై సరైన సమయంలో స్పందిస్తాం. ఇరాన్ తెలివైన దేశం. జియోనిస్టు(ఇజ్రాయెల్ మద్దతుదారు)ల ఉచ్చులో చిక్కుకోదు. గందరగోళం సృష్టించాలని వారు భావిస్తున్నారు."

-హసన్ రౌహానీ, ఇరాన్ అధ్యక్షుడు

అబ్సర్డ్ అనే గ్రామంలో ఫక్రజాదేపై దాడి జరిగింది. పేలుడు పదార్థాలతో కూడిన ట్రక్కు ఆయన ప్రయాణిస్తున్న కారు సమీపంలో పేలిందని అక్కడి మీడియా తెలిపింది. కారు ఆగిన తర్వాత ఐదుగురు సాయుధులు కాల్పులకు పాల్పడ్డారని వెల్లడించింది. ఈ ఘటనలో గాయపడ్డ ఫక్రజాదే ఆస్పత్రిలో మరణించారని స్పష్టం చేసింది.

దశాబ్దం క్రితం అనేక మంది ఇరాన్​ అణు శాస్త్రవేత్తలను హత్య చేశారని ఇజ్రాయెల్​పై ఆరోపణలు ఉన్నాయి. అయితే తాజా హత్యపై మాత్రం ఇజ్రాయెల్ ఎలాంటి స్పందన తెలియజేయలేదు.