ప్రపంచంలోనే అత్యంత ఖరీదైన 'బంగారు ఐస్​క్రీం'!

ఈ మధ్య ఇంటర్నెట్​లో విభిన్నమైన ఆహార పదార్ధాలకు సంబంధించిన వార్తలు బాగా వైరల్ అవుతున్నాయి. 'ఫైర్ దోశ', అందమైన 'థాలీ' వంటివి ఆహార ప్రియులను తెగ ఆకర్షిస్తున్నాయి. ఈ కోవలోకే చెందింది ఈ 'గోల్డ్ ఐస్​క్రీం'.

ఇప్పుడు మీరు చూడబోయేది ఖరీదైన ఐస్ క్రీం. ఏంటి దీని ప్రత్యేకత అనుకుంటున్నారా? ఏకంగా బంగారంతో తయారైంది మరి.! 'బ్లాక్ డైమండ్​'గా పిలుస్తున్న ఈ ఐస్​క్రీంను 'ప్రపంచంలోనే అత్యంత ఖరీదైన' ఐస్ క్రీంగా చెబుతున్నారు. 'షెనాజ్ ట్రెజరీ' అనే ట్రావెల్ వ్లాగర్ తన ఇన్‌స్టాగ్రామ్‌ ఖాతాలో షేర్ చేసిన ఈ వీడియో సామాజిక మాధ్యమాల్లో వైరల్​గా మారింది.

దుబాయ్​లోని 'స్కూపీ కేఫ్' తయారు చేసిన ఈ ఐస్​క్రీంను తినదగిన బంగారంతో అలంకరించారు. దీనితో పాటు తాజా వెనీలా బీన్స్, కుంకుమ పువ్వు, బ్లాక్ ట్రఫుల్స్ ఉపయోగించి ఈ డిజర్ట్(ఐస్​క్రీం)ను తయారు చేశారు. దీని ధర ఏకంగా రూ.60 వేలు.

రెండు రోజుల క్రితమే పోస్ట్ చేసిన ఈ వీడియో 2 లక్షల వ్యూస్​ని సొంతం చేసుకుంది. అంతేగాక దీనిపై సరదా కామెంట్లు వెల్లువెత్తుతున్నాయి.

'వావ్.. మీరు జీవితంలో ప్రతిదాన్నీ బాగా ఆస్వాదిస్తున్నారు' కదా అని ఒకరు కామెంట్ చేశారు. 'ఐ రియల్లీ లవ్ దిస్ ఐస్​క్రీం' అంటూ మరొకరు వ్యాఖ్యానించారు. 'ఐస్‌క్రీమ్‌తో పాటు చెంచా, గిన్నె కూడా ఫ్రీగా వస్తాయా? అంటే మీరు వాటిని ఇంటికి తీసుకెళ్లొచ్చా' అని మరొకరు చమత్కరించారు. దీనికి స్పందించిన ఆమె అవును అంటూ సమాధానమిచ్చింది.

ఇవీ చదవండి: