ఇరాన్​ గగనతలం మీదుగా విమానాలు నడపొద్దు:ఈసా

ఉక్రెయిన్ విమానాన్ని పొరపాటున కూల్చివేసిన నేపథ్యంలో ఇరాన్​ గగనతలం మీదుగా వెళ్లొద్దని ఐరోపా సమాఖ్య... తన విమాన సంస్థలకు సూచించింది. తదుపరి సూచనలు అందే వరకు ఈ ఆదేశాలు పాటించాలని స్పష్టం చేసింది.

ఇరాన్ గగనతలం మీదుగా విమానాలు నడపొద్దని ఈయూ ఎయిర్​ సేఫ్టీ ఏజెన్సీ (ఈసా) ఎయిర్​లైన్​ సంస్థలకు సూచించింది. ఉక్రెయిన్​ విమానాన్ని టెహ్రాన్​ సమీపంలో ఇటీవల ఇరాన్​ భద్రతా దళాలు పొరపాటున కూల్చిన నేపథ్యంలో ఈ సూచనలు చేసింది. ఇరాన్ సైన్యం​ పొరపాటున కూల్చిన ఈ విమాన ప్రమాదంలో ప్రయాణికులు, సిబ్బంది కలిపి మొత్తం 176 మంది ప్రాణాలు కోల్పోయారు.

"అందుబాటులో ఉన్న పూర్తి సమాచారం మేరకు.. ఇరాన్​ గగనతలం మీద అన్ని ఎత్తుల్లో విమాన ప్రయణాలు నిషేధించాలని సూచిస్తున్నాం. తదుపరి ప్రకటన వచ్చే వరకు ఈ ఆదేశాలు పాటించాలని ఆదేశిస్తున్నాం." -ఈసా ప్రకటన

ఇదిలా ఉండగా.. మరోసారి ఇలాంటి పొరపాటు జరగకుండా చర్యలు తీసుకోవాలని తమ భద్రతా దళాలను ఆదేశించారు ఇరాన్ సుప్రీం లీడర్ ఆయతుల్లా అలీ కామేని. ఈ విషయంపై ఇరాన్​ స్వతంత్ర, పారదర్శకమైన దర్యాప్తు చేయాలని అంతర్జాతీయ సమాజం డిమాండ్ చేస్తోంది.

ఇదీ చూడండి:'ఇరాన్​ ​జవాబుదారీతనంగా ఉండాలి'