ఇజ్రాయెల్తో సంబంధాల పునరుద్ధరణకు మరో అరబ్ దేశం ముందుకొచ్చింది. అమెరికా అధ్యక్షుడు డొనాల్డ్ ట్రంప్ చేపట్టిన దౌత్య ప్రయత్నాల్లో భాగంగా ఇజ్రాయెల్తో సంబంధాలు సాధారణ స్థితికి తీసుకొచ్చేందుకు బహ్రెయిన్ అంగీకరించింది.
ఇజ్రాయెల్ ప్రధాని బెంజమిన్ నెతన్యాహు, బహ్రెయిన్ రాజు హమద్ బిన్ ఇసా అల్ ఖలీఫాతో ఫోన్లో సంభాషించిన అనంతరం ఈ విషయాన్ని ట్రంప్ వెల్లడించారు. ఇందుకు సంబంధించి ముగ్గురు దేశాధినేతలు కలిసి సంయుక్త ప్రకటన విడుదల చేశారు.
2001 సెప్టెంబర్ 11న (9/11) ఉగ్రదాడులు జరిగి 19 ఏళ్లు అయిన సందర్భంగా ఈ ప్రకటన చేయడం గమనార్హం. ఈ ఒప్పందంపై స్పందించిన అమెరికా అధ్యక్షుడు డొనాల్డ్ ట్రంప్.. 9/11 దాడులకు ఇంతకుమించి శక్తిమంతమైన సమాధానం ఇంకోటి ఉండదని పేర్కొన్నారు. ఇది మరో చారిత్రాత్మకమైన నిర్ణయమని అభివర్ణించారు.
యూఏఈ మాదిరిగానే
ఇజ్రాయెల్తో సంబంధాలు సాధారణ స్థితికి తీసుకొచ్చేందుకు ఇప్పటికే యూఏఈ అంగీకారానికి వచ్చింది. తాజాగా బహ్రెయిన్ ఒప్పందంతో ట్రంప్కు రోజుల వ్యవధిలో మరో దౌత్యపరమైన విజయం చేకూరినట్లయింది. అమెరికా అధ్యక్ష ఎన్నికలకు మరో రెండు నెలలు ఉన్న నేపథ్యంలో ఆయకు ఇది కలిసొచ్చే అంశంగా కనిపిస్తోంది.
యూఏఈ ఒప్పందం మాదిరిగానే.. బహ్రెయిన్-ఇజ్రాయెల్ డీల్ కూడా ఇరుదేశాల మధ్య దౌత్య, వాణిజ్య, రక్షణ సహా ఇతర సంబంధాలు సాధారణ స్థితికి తీసుకొచ్చేందుకు కృషి చేస్తుంది. ఈ ఒప్పందం ద్వారా ఇజ్రాయెల్తో పూర్తి స్థాయి దౌత్య సంబంధాలు ఏర్పరచుకున్న నాలుగో అరబ్ దేశంగా బహ్రెయిన్ మారనుంది.
72 ఏళ్లుగా రెండే
ఈ ఒప్పందంపై ట్రంప్ అల్లుడు, అమెరికా అధ్యక్షుడికి సీనియర్ సలహాదారుడు జారెడ్ కుష్నర్ హర్షం వ్యక్తం చేశారు. 30 రోజుల వ్యవధిలో ఇజ్రాయెల్తో రెండో అరబ్ దేశం ఒప్పందం చేసుకుందని పేర్కొన్నారు. ఇజ్రాయెల్ స్వాతంత్ర్యం సాధించిన 72 ఏళ్ల తర్వాత కూడా రెండు అరబ్ దేశాలైన ఈజిప్ట్, జోర్డాన్ దేశాలతో మాత్రమే శాంతి ఒప్పందం చేసుకుందని గుర్తు చేశారు.
