ఇరాక్​: అమెరికా​ దౌత్య కార్యాలయంపై రాకెట్​ దాడి

పశ్చిమాసియా దేశాల్లో ఉద్రిక్తతలు అంతకంతకూ పెరుగుతూనే ఉన్నాయి. గతవారం ఇరాన్​ అగ్ర కమాండర్ ఖాసిం సులేమానీ సహా ఇరాక్​ సైనిక బలగాలపై డ్రోన్ దాడితో అమెరికా విరుచుకుపడింది. అనంతరం ఇరాన్, అమెరికా మధ్య ఘర్షణ వాతావరణం నెలకొంది. ఈ నేపథ్యంలో ఇరాక్​లోని అమెరికా రాయబార కార్యాలయం లక్ష్యంగా ఆదివారం మరో రాకెట్ దాడి జరిగింది.

ఇరాక్​లో ఉద్రిక్త పరిస్థితులు కొనసాగుతూనే ఉన్నాయి. తాజాగా బాగ్దాద్​లోని అమెరికా రాయబార కార్యాలయానికి సమీపంలో రెండు రాకెట్​ దాడులు జరిగాయి. మరో రాకెట్..​ గ్రీన్​ జోన్​ పరిధికి సమీపంలోని ఓ నివాసంపై పడింది. ఇంటిలోని నలుగురికి గాయాలయ్యాయి.

ఇరాన్ అగ్ర కమాండర్ ఖాసీం సులేమానీ, ఇతర ఇరాక్ సైనిక బలగాలే లక్ష్యంగా అమెరికా డ్రోన్ దాడితో పశ్చిమాసియా దేశాల్లో ఉద్రిక్తతలు నెలకొన్న నేపథ్యంలో ఈ రాకెట్​ దాడి తీవ్ర కలకలం రేపుతోంది. గత రెండు నెలల్లో అమెరికా వ్యవస్థలే లక్ష్యంగా దాడులు జరగడం ఇది 14వ సారి.

కట్టుదిట్టమైన భద్రత

ఇరాక్​లోని ఆయా సైనిక క్యాంపుల్లో 5200 అమెరికా సైనికులు మోహరించారు. ఇస్లామిక్ స్టేట్ ఉగ్రవాదం పెరగకుండా రక్షణ వ్యవస్థను కాపాడటం లక్ష్యంగా ఇరాక్ బలగాలతో కలిసి పనిచేస్తోంది అమెరికా సైన్యం.

ఇదీ చూడండి:సీఏఏపై ప్రజలను తప్పుదోవ పట్టిస్తున్నారు: షా