Gambia cough syrup death : భారత్కు చెందిన ఓ ఔషధాల తయారీ సంస్థకు ప్రపంచ ఆరోగ్య సంస్థ అలర్ట్ జారీ చేసింది. ఆ సంస్థ భద్రతా ప్రమాణాలు పాటిస్తుందా లేదా అని తేల్చేందుకు దర్యాప్తు చేపట్టింది. హరియాణా కేంద్రంగా పనిచేసే మెయిడెన్ ఫార్మాసూటికల్స్ లిమిటెడ్ తయారు చేసిన నాలుగు 'కలుషిత' సిరప్లు ఆఫ్రికన్ దేశమైన గాంబియాలో 66 మంది చిన్నారుల మృతికి, మరికొందరు కిడ్నీ సంబంధిత సమస్యల బారిన పడేందుకు కారణం కావచ్చొన్న వార్తల నేపథ్యంలో ఈమేరకు చర్యలు చేపట్టింది డబ్ల్యూహెచ్ఓ.
WHO Gambia cough syrup : "ఈ నాలుగు ఔషధాలు.. భారత్లోని మెయిడెన్ ఫార్మాసూటికల్స్ లిమిటెడ్ ఉత్పత్తి చేసిన దగ్గు, జలుబు మందులు. ఆ కంపెనీతోపాటు భారత్లోని నియంత్రణ సంస్థలతో సమన్వయం చేసుకుంటూ ఈ వ్యవహారంపై ప్రపంచ ఆరోగ్య సంస్థ దర్యాప్తు చేపడుతోంది." అని బుధవారం తెలిపారు డబ్ల్యూహెచ్ఓ డైరక్టర్ జనరల్ టెడ్రోస్ అధనోమ్. ప్రాణాలు కోల్పోయిన చిన్నారుల కుటుంబీకుల బాధ వర్ణనాతీతం అన్నారు.
ప్రొమెతజైన్ ఓరల్ సొల్యూషన్, కాఫెక్స్మాలిన్ బేబీ కాఫ్ సిరప్, మాకాఫ్ బేబీ కాఫ్ సిరప్, మేగ్రిప్ ఎన్ కోల్డ్ సిరప్ విషయంలో మెయిడెన్ ఫార్మాకు అలర్ట్ జారీ చేసింది డబ్ల్యూహెచ్ఓ. వీటి ఉత్పత్తిలో పూర్తిస్థాయిలో భద్రత, నాణ్యతా ప్రమాణాల్ని పాటించినట్టుగా ఇప్పటివరకు ఆ సంస్థ తమకు తగిన ఆధారాలు సమర్పించలేదని చెప్పింది ప్రపంచ ఆరోగ్య సంస్థ. ఈ 'కలుషిత' ఔషధాలు ప్రస్తుతానికి గాంబియాలోనే వెలుగు చూసినా.. ఇతర దేశాలకూ వాటిని సరఫరా చేసి ఉండొచ్చని ఆందోళన వ్యక్తం చేసింది. ఆ నాలుగు సిరప్లు మార్కెట్లో లేకుండా చేయాలని అన్ని దేశాలకు డబ్ల్యూహెచ్ఓ సూచించింది.
గాంబియాలో చిన్నారుల మరణాల నేపథ్యంలో ఈ నాలుగు ఔషధాలపై సెప్టెంబర్లో ప్రపంచ ఆరోగ్య సంస్థకు ఫిర్యాదు అందింది. ఆయా సిరప్లలో అధిక మోతాదుల్లో డైఎథిలీన్ గ్లైకాల్, ఎథిలీన్ గ్లైకాల్ ఉన్నట్లు పరీక్షల్లో తేలింది. ఆ రెండూ చాలా ప్రమాదకరమని, మరణానికీ కారణం కావచ్చని డబ్ల్యూహెచ్ఓ తెలిపింది. "డైఎథిలీన్ గ్లైకాల్, ఎథిలీన్ గ్లైకాల్ కారణంగా కడుపు నొప్పి, వాంతులు, డయేరియా, మూత్ర విసర్జనలో ఇబ్బందులు, తల నొప్పి, మానసికంగా అనిశ్చితి, తీవ్రమైన కిడ్నీ సమస్యలు తలెత్తి.. చివరకు మరణానికి దారి తీయవచ్చు" అని ప్రపంచ ఆరోగ్య సంస్థ వివరించింది. సంబంధిత సంస్థలు ఆయా సిరప్లను విశ్లేషించి, క్లియరెన్స్లు ఇచ్చే వరకు వాటిని హానికరమైన ఔషధాలగానే పరిగణించాలని సూచించింది.
భారత్లో లేవు!
కాగా, ఈ ఔషధం భారత్లో సరఫరా చేయడం లేదని ఆల్ఇండియా ఆరిజిన్ కెమిస్ట్స్, డ్రగ్గిస్ట్స్ అసోసియేషన్ తెలిపింది. ఇవి ఎగుమతి చేయడానికి మాత్రమే భారత్లో ఉత్పత్తి చేస్తున్నట్లు తెలిపింది. దీనిపై డ్రగ్స్ కంట్రోలర్ జనరల్ నిర్దేశించిన మార్గదర్శకాలను పాటిస్తామని స్పష్టం చేసింది.
