విమానంలో ప్రయాణికుడిపై టైసన్​ పిడిగుద్దుల వర్షం- అసలేమైందంటే?

Mike Tyson: విమానంలో తోటి ప్రయాణికుడికి తన పంచ్​ పవర్ చూపించాడు బాక్సింగ్ లెజెండ్ మైక్ టైసన్​. తన వెనకాల సీట్లో కూర్చొని.. ఇబ్బందిపెట్టిన వ్యక్తిని ఆగ్రహంతో చితక్కొట్టాడు. ఇందుకు సంబంధించిన వీడియో సామాజిక మాధ్యమాల్లో వైరల్​గా మారింది.

Mike Tyson News: దిగ్గజ బాక్సర్​, మాజీ ఛాంపియన్​ మైక్ టైసన్​కు సంబంధించిన వీడియో ఒకటి సామాజిక మాధ్యమాల్లో వైరల్ అవుతోంది. విమానంలో తోటి ప్రయాణికుడిపై అతను పిడిగుద్దుల వర్షం కురిపించాడు. ఆవేశంలో పంచ్​లతో విరుచుకుపడ్డాడు. ఈ దెబ్బకు బాధితుడి మొహం నుంచి రక్తం చిందింది. అమెరికా శాన్​ఫ్రాన్సిస్కో ఇంటర్నేషనల్​ విమానాశ్రయం నుంచి ఫ్లోరిడా వెళ్లే విమానంలో బుధవారం రాత్రి జరిగిన ఈ ఘటనపై అధికారులు విచారణ చేపట్టారు.

Mike Tyson Video: అయితే తన సీట్లో ప్రశాంతంగా కూర్చున్న మైక్ టైసన్​ను వెనక సీట్లో కూర్చున్న ఓ ప్రయాణికుడు బాగా ఇబ్బంది పెట్టినట్లు తెలుస్తోంది. టైసన్​ను పలుమార్లు వేధించడమే గాక.. వాటర్​ బాటిల్​ను కూడా అతనిపైకి విసిరినట్లు సమాచారం. దీంతో కోపోద్రిక్తుడైన మైక్​.. తన సీట్లోనుంచి లేచి వెనకాల ఉన్న వ్యక్తిని చితకబాదాడు. ఆ తర్వాత బాధితుడి మొహం నుంచి రక్తం వచ్చింది. దీంతో అతడు ముఖం అదోలా పెట్టి కెమెరావైపు చూశాడు. ప్రయాణికుడు టైసన్​తో దురుసుగా ప్రవర్తించడం వల్లే ఇలా జరిగిందని మైక్ టైసన్​ ప్రతినిధి మీడియాకు తెలిపారు. ఈ ఘటన దురదృష్టకరమన్నారు.

Mike Tyson punching airline passenger: ఘటనపై సమాచారం అందగానే పోలీసులు అక్కడకు వెళ్లారు. ఇద్దరిని అదుపులోకి తీసుకొని విచారించారు. చిన్నపాటి గాయాలే కావడం వల్ల ఆ వ్యక్తికి చికిత్స అక్కడే అందించారు. అయితే ఘటనకు సంబంధించి వివరాలు వెల్లడించేందుకు అతను నిరాకరించినట్లు అధికారులు చెప్పారు. అనంతరం ఇద్దరినీ విడిచిపెట్టామని, తదుపరి విచారణ ఇంకా జరగాల్సి ఉందని పేర్కొన్నారు. ఈ ఘటన సమయంలో విమానంలో ఉన్న సారా బుర్చ్​ఫీల్డ్ కొన్ని ఆసక్తికర విషయాలు వెల్లడించారు. టైసన్ చేతిలో దెబ్బలు తిన్న వ్యక్తిని ముందుగా విమానాశ్రయంలోని బార్​లో చూశానని.. అతను తాగి ఉన్నాడని పేర్కొన్నారు. బిగ్గరగా అరుస్తూ గోల చేశాడని వివరించారు. మొదట టైసన్, ఆ వ్యక్తి మాట్లాడుకున్నారని, ఆ తర్వాత కాసేపటికే ఇద్దరి మధ్య గొడవ జరిగిందని చెప్పారు.

ఇదీ చదవండి:'మరియుపోల్​కు విముక్తి..' ఆ ప్రాంతాన్ని చట్టుముట్టొద్దని పుతిన్ ఆదేశం