అమెరికా డల్లాస్లో ఏర్పాటు చేసిన ఎయిర్ షోలో ఘోర ప్రమాదం జరిగింది. రెండో ప్రపంచ యుద్ధ స్మారకంగా ఏర్పాటు చేసిన ఎయిర్ షోలో భాగంగా విన్యాసాలు చేస్తున్న రెండు సైనిక విమానాలు ఒకదానికొకటి ఢీ కొన్నాయి. ఈ ప్రమాదంలో ఆరుగురు అక్కడిక్కడే మరణించారు. శనివారం మధ్యాహ్నం సుమారు 1.20 సమయంలో ఈ ఘటన జరిగింది. సమాచారం అందుకున్న అత్యవసర సిబ్బంది హుటాహుటిన విమానాశ్రయం వద్దకు చేరుకుని సహాయక చర్యలు చేపట్టారు. ఈ ఘటనపై దర్యాప్తునకు ఆదేశించింది అమెరికా ప్రభుత్వం.
విమానంలో ఎంత మంది ఉన్నారన్న విషయాన్ని అధికారులు ఇంకా వెల్లడించలేదు. అయితే సాధారణంగా B-17 ఫ్లైయింగ్ ఫోర్ట్రెస్ బాంబర్లో నలుగురు నుంచి ఐదుగురు సిబ్బంది ఉంటారని.. P-63 కింగ్‌కోబ్రా యుద్ధ విమానంలో మాత్రం ఒక పైలట్‌ మాత్రమే ఉంటారని ఎయిర్‌షో నిర్వాహకులు హాంక్ కోట్స్ తెలిపారు. విమానంలో ప్రయాణికులు లేరని.. విమానాలు కూడా వైమానిక దళానికి చెందినవని ఆయన అన్నారు. విమానాలను అత్యంత శిక్షణ పొందిన పైలట్లే నడుపుతారని హాంక్ పేర్కొన్నారు.