బ్రిటన్ శాస్త్రవేత్తలు వినూత్న ప్రయోగానికి శ్రీకారం చుట్టారు. ముగ్గురు వ్యక్తుల డీఎన్ఏతో ఓ శిశువును సృష్టిస్తున్నారు. శిశువుల్లో జన్యుపరమైన వ్యాధులను నివారించడానికే ఇలా చేస్తున్నట్లు శాస్త్రవేత్తలు తెలిపారు. ఇలా బ్రిటన్లో ఐదుగురు శిశువులను ఇప్పటివరకు జన్మించినట్లు పేర్కొన్నారు. ఈ విషయాన్ని అధికారికంగా హ్యూమన్ ఫెర్టిలైజేషన్ అండ్ ఎంబ్రియాలజీ అథారిటీ(హెచ్ఈఎఫ్ఏ) తెలిపింది.
జన్యుపరమైన లోపాల వల్ల కండరాల బలహీనత, మూర్ఛ, గుండె సమస్యలు వంటి వ్యాధులు వస్తాయి. ఈ వ్యాధులను నివారించేందుకే శాస్త్రవేత్తలు ఈ ప్రయోగం చేపట్టినట్లు గార్డియన్ పత్రిక ఓ కథనంలో తెలిపింది. బ్రిటన్లో ప్రతి 200 మంది పిల్లల్లో ఒకరు మైటోకాండ్రియల్ డిజార్డర్తో పుడుతున్నారు. ఈ నేపథ్యంలో శాస్త్రవేత్తలు జన్యుపరమైన లోపాలను సరిదిద్దేందుకు ముగ్గురు డీఎన్ఏలను ఉపయోగించి ఒక శిశువును సృష్టిస్తున్నారు. మైటోకాండ్రియా డొనేషన్ టెక్నిక్ ద్వారా ప్రపంచంలోనే మొట్టమొదటిసారిగా మెక్సికోలో 2016లో ఓ శిశువు జన్మించింది.
ఇదీ ప్రాసెస్..
ఈ టెక్నిక్లో మొదట.. మైటోకాండ్రియల్ డిజార్డర్తో బాధపడుతున్న మహిళ అండం నుంచి జన్యుపదార్థాలను సేకరిస్తారు. దాత ఇచ్చిన అండంలో మైటోకాండ్రియాను సజీవంగా ఉంచి.. కీలకమైన డీఎన్ఏలను తొలగిస్తారు. మొదటి మహిళ నుంచి సేకరించిన జన్యు పదార్థాలను.. దాత అండంలోకి బదిలీ చేస్తారు. ఆ అండాన్ని మహిళ శరీరంలో ప్రవేశపెడతారు.
"బ్రిటన్లో మైటోకాండ్రియల్ వ్యాధితో చాలా మంది శిశువులు బాధపడుతున్నారు. ఇలా తమ గర్భంలో డీఎన్ఏలను ప్రవేశపెట్టుకునేందుకు ప్రతి మహిళ హ్యూమన్ ఫెర్టిలైజేషన్ అండ్ ఎంబ్రియాలజీ అథారిటీ అనుమతి పొందాలి. ఇలా మహిళలు చేయడం వల్ల శిశువులు జన్యు సంబంధమైన వ్యాధులు బారిన పడకుండా పుడతారు. అలాగే మైటోకాండ్రియల్ వ్యాధి ముప్పు నుంచి తప్పించుకోవచ్చు. ఇలా ఇప్పటివరకు 32 మంది మహిళలు మైటోకాండ్రియా డొనేషన్ టెక్నిక్ ద్వారా శిశువులను కనేందుకు అనుమతి పొందారు."
-హ్యూమన్ ఫెర్టిలైజేషన్ అండ్ ఎంబ్రియాలజీ అథారిటీ
రెండు మగ ఎలుకల సంతానం..
జపాన్ శాస్త్రవేత్తలు ఓ అరుదైన ఘనత సాధించారు. రెండు మగ ఎలుకల నుంచి ఓ సంతానాన్ని ఉత్పత్తి చేశారు. జపాన్‌లోని క్యుషు, ఒసాకా విశ్వవిద్యాలయాల శాస్త్రవేత్తల బృందం ఈ ఏడాది మార్చిలో ఈ ఘనతను సాధించింది. పురుష జీవుల చర్మ కణాలలో నుంచి.. అండాలను సేకరించి ఈ ఎలుకలను రూపొందించినట్లు ది గార్డియన్ వార్తా పత్రిక నివేదించింది. మానవులలో కొత్త సంతానోత్పత్తి చికిత్సలకు ఇది దోహదపడే అవకాశం ఉందని పేర్కొంది. ఈ పూర్తి వార్త కోసం ఇక్కడ క్లిక్ చెయ్యండి.
