Sri Lanka economic crisis: ద్వీప దేశం శ్రీలంకలో ఆర్థిక, ఆహారంతో పాటు ప్రస్తుతం రాజకీయ సంక్షోభం నెలకొంది. దేశంలో అఖిలపక్ష ప్రభుత్వాన్ని ఏర్పాటు చేయాలని ఆ దేశ మాజీ అధ్యక్షుడు మైత్రిపాల సిరిసేనకు చెందిన శ్రీలంక ఫ్రీడం పార్టీ-ఎస్ఎల్ఎఫ్పీ అధ్యక్షుడు గొటబయ రాజపక్సకు పిలుపునిచ్చింది. లేనిపక్షంలో కూటమి నుంచి వైదొలుగుతామని స్పష్టం చేశారు. ఈ మేరకు పార్లమెంటులో అన్ని పార్టీలకు చెందిన ప్రభుత్వం నెలకొల్పాలని తమ పార్టీ జాతీయ కమిటీ నిర్ణయించినట్లు ఎస్ఎల్ఎఫ్పీ ప్రధాన కార్యదర్శి దయసిరి జయశేఖర వెల్లడించారు. అధికారంలో ఉన్న శ్రీలంక పొదుజన పెరమున-ఎస్ఎల్పీపీ .. 11 పార్టీలతో కలిసి ప్రభుత్వాన్ని నడిపిస్తోంది. ఈ కూటమిలో 14 మంది సభ్యులతో సిరిసేనకు చెందిన ఎస్ఎల్ఎఫ్పీ అతిపెద్ద పార్టీగా ఉంది. ఇప్పటికే ఇద్దరు క్యాబినెట్ మంత్రులను తొలగించగా, ప్రస్తుత సంక్షోభాన్ని వ్యతిరేకిస్తూ మరో సభ్యుడు దూరంగా ఉంటున్నారు. ఈ నేపథ్యంలో తాజాగా ఎస్ఎల్ఎఫ్పీ హెచ్చరికలతో గొటబయ ప్రభుత్వానికి గండం పొంచి ఉందని రాజకీయ విశ్లేషకులు పేర్కొంటున్నారు.
అత్యవసర పరిస్థితి:తీవ్ర ఆర్థిక సంక్షోభంతో కొట్టుమిట్టాడుతున్న శ్రీలంకలో కొన్నిరోజులుగా ప్రజలు నిత్యవసరాల కోసం అల్లాడుతున్నారు. పెరిగిన ధరలు, ఆహార పదార్థాలు, విద్యుత్ కోతలు, ఇంధన కొరతతో ప్రజలు రోడ్లపైకి వచ్చి ఆందోళనలు, నిరసన ప్రదర్శనలు చేపడుతున్నారు. ఈ నేపథ్యంలో గురువారం అర్ధరాత్రి అధ్యక్షుడు గొటబయ రాజపక్స ఇంటిని ఆందోళనకారులు ముట్టడించారు. ఆదివారం దేశవ్యాప్త నిరసనలకు పిలుపునిచ్చారు. ఈ ఆందోళనలను అణచివేయడానికి రాజపక్స హుటాహుటిన అత్యవసర పరిస్థితి విధించారు. అత్యవసర పరిస్థితి సమయంలో ఎవరినైనా నిర్బంధించడం, ఏదైనా ఆస్తిని స్వాధీనం చేసుకోవడం, దేశంలో ఎక్కడైనా సోదాలు జరిపే అధికారం అధ్యక్షుడికి ఉంటుంది. ఏదైనా చట్టాన్ని మార్చే అధికారం కూడా లభిస్తుంది. అయితే ఈ ఆంక్షలకు ప్రతీ 30 రోజులకు ఒకసారి పార్లమెంట్ ఆమోదించాల్సి ఉంటుంది. ఈ పరిస్థితుల్లో ఎస్ఎల్ఎఫ్పీ హెచ్చరికలు ప్రాధాన్యం సంతరించుకున్నాయి.