Impeach President Gotabaya: తీవ్ర సంక్షోభంలో కొట్టు మిట్టాడుతున్న శ్రీలంకలో కీలక పరిణామాలు చోటు చేసుకుంటున్నాయి. ఇంధన ధరలు, నిత్యావసరాలు ఆకాశాన్ని తాకడం వల్ల తినడానికి నానా అవస్థలు పడుతున్న జనం రాజపక్స ప్రభుత్వంపై తీవ్ర ఆగ్రహావేశాలతో రగిలిపోతున్నారు. ఈ నేపథ్యంలో జనం చెప్పేది వినకపోతే ప్రభుత్వంపై అవిశ్వాస తీర్మానం పెట్టేందుకు పలు రాజకీయ పార్టీలు సిద్ధమవుతున్నాయి. మరోవైపు, మంత్రి పదవి చేపట్టేందుకు ఎవరూ ముందుకు రాకపోవడం వల్ల తన రాజీనామా రద్దు చేసుకున్నట్టు ఆర్థిక మంత్రి అలీ సబ్రీ స్పష్టంచేశారు. శ్రీలంకలో శుక్రవారం జరిగిన కొన్ని కీలక పరిణామాలివీ..
• Sri Lanka Economic Crisis:శ్రీలంక అధ్యక్షుడు గొటబాయ రాజపక్స, ప్రభుత్వం ప్రజలు చెప్పింది వినకపోతే రాజ్యాంగంలోని నిబంధనల ప్రకారం ప్రభుత్వంపై అవిశ్వాస తీర్మానం పెట్టాల్సి వస్తుందని ప్రతిపక్ష నేత సాజిత్‌ ప్రేమదాస హెచ్చరించారు. ఓట్లు వేసి గెలిపించిన జనాన్ని మర్చిపోవద్దని హితవు పలికారు. ప్రజల వద్దకు ఎలా తిరిగి వెళ్లగలరో నిర్ణయించుకోండని ప్రభుత్వానికి సూచించారు.
• ఔషధాల కొరత శ్రీలంకను వేధిస్తుండటంతో అక్కడ ఆరోగ్య వ్యవస్థ కుదేలైంది. ఆస్పత్రుల్లో తగిన మందుల్లేకపోవడం వల్ల దేశంలోని పలు చోట్ల వైద్యులు, నర్సులు నిరసన వ్యక్తం చేస్తున్నారు. రత్మలానాలో స్టేట్‌ ఫార్మాస్యూటికల్‌ కార్పొరేషన్‌ కార్యాలయం ఎదుట శుక్రవారం నిరసన తెలిపారు. మందుల కొరతను తీర్చేందుకు తక్షణమే పరిష్కారం కనుగొనాలని డిమాండ్ చేస్తున్నారు.
• ఆర్థిక, ఆహార, ఇంధన సంక్షోభంతో అల్లాడుతున్న శ్రీలంక రాబోయే రోజుల్లో మరిన్ని గడ్డు పరిస్థితులు ఎదుర్కొనే అవకాశాలు కనబడుతున్నాయి. ఇంధన సంక్షోభం నుంచి గట్టేక్కించేందుకు 500 మిలియన్‌ డాలర్ల విలువైన చమురును లైన్‌ ఆఫ్‌ క్రెడిట్‌గా భారత్‌ అందిస్తుండగా.. దీన్ని శ్రీలంక వేగంగా వినియోగించుకుంటోంది. ఈ నెలాఖరుకు ఈ చమురు నిల్వలు కూడా తరిగిపోనున్నాయి. ఒకవేళ భారత్‌ నుంచి ఈ సహాయం కొనసాగింపు లేకపోతే శ్రీలంకలో డీజిల్‌ బంకులు మళ్లీ ఖాళీ అయ్యే ప్రమాదం ఉందంటూ పలు నివేదికలు పేర్కొంటున్నాయి.
• మంత్రి పదవికి రాజీనామా చేసినా ఇప్పటికీ తమ దేశ ఆర్థిక మంత్రి అలీ సబ్రీయేనని అధికార పార్టీకి చెందిన ఎంపీ కాంచన విజెశేఖర అన్నారు. ఈ మేరకు శుక్రవారం ఆయన పార్లమెంట్‌లో మాట్లాడారు. అలీ సబ్రీ మంత్రి పదవికి రాజీనామా చేస్తూ ఇచ్చిన లేఖను అధ్యక్షుడు గొటబాయ ఆమోదించేదన్నారు. దీంతో ఆయనే ఆర్థికమంత్రిగా కొనసాగుతారని చెప్పారు. ఇటీవల కొత్త ఆర్థిక మంత్రిగా సబ్రీ నియమితులవ్వగా.. 24గంటల్లోనే రాజీనామా చేయడం చర్చనీయాంశంగా మారిన విషయం తెలిసిందే.