రక్తం ఏరులై పారిన భీకర పోరు తర్వాత తూర్పు ఉక్రెయిన్లోని దొనెత్క్స్‌ ప్రావిన్స్‌లో ఉన్న సోలెడార్‌ పట్టణాన్ని స్వాధీనం చేసుకున్నట్లు రష్యా రక్షణ శాఖ ప్రకటించింది. ఇటీవల కాలంలో యుద్ధ రంగంలో పలు ఎదురు దెబ్బలు తిన్న రష్యాకు ఇది అరుదైన విజయంగా రక్షణ రంగ నిపుణులు పేర్కొంటున్నారు. ఉక్రెయిన్ యుద్ధం ప్రారంభం నుంచి దొనెత్స్క్‌, లుహాన్క్స్‌ ప్రావిన్స్‌లపైనే రష్యా ప్రధానంగా గురిపెట్టింది. వాటిని ఆక్రమించి తమ దేశంలో విలీనం చేసుకుంది. ఈ నెల 12వ తేదీన సోలెడార్‌ పట్టణం తమ సొంతమైనట్లు రష్యా ప్రకటించింది.
బఖ్‌మత్‌ నగరంపై గురి
కీలకమైన సోలెడార్‌ను ఆక్రమించడం వల్ల దొనెత్స్క్‌ ప్రావిన్స్‌లోని బఖ్‌మత్‌ నగరంలో ఉన్న ఉక్రెయిన్ దళాలకు రవాణాదారులను రష్యా సైన్యం మూసివేయనుంది. అక్కడ ఉన్న ఉక్రెయిన్ దళాలను రష్యా సైన్యం చుట్టుముట్టే వీలుంటుంది. కొన్ని నెలలుగా బఖ్‌మత్‌ నగరం ముట్టడికి రష్యా విశ్వప్రయత్నం చేస్తోంది.